“Чолбон:өй күрэһэ” республикатааҕы ааҕар дьиэ кэргэн күрэһэр Таатта улууһун аатыттан Баайаҕаттан Кустуроватар учуутал династиялара кыттан кыайыыны ситистилэр, Өлүөнэ очуостарыгар  путевканан наҕараадалыннылар.  Үс түһүмэхтээх киирсиигэ кыттыыларын туһунан кинилэр санааларын истиэҕиҥ:

Кустурова Полина Николаевна, педагогическай үлэ бэтэрээнэ, Россия уопсай үөрэхтээһинин бочуоттаах үлэһитэ, СР үөрэҕириитин туйгуна:

 Сахалыы саҥа айымньылары билиһиннэрэр, атын да литератураҕа, общество олоҕор сыһыаннаах суруйуулары бэчээтиир баар-суох улахан сахалыы сурунаалбыт “Чолбон” тэрийэн ыыппыт: “Чолбон: өй күрэһигэр” балтыларбын кытта кыттыбыппыттан олус астынным. Тэрийээччилэр үгүс үлэни көрүстүлэр, элбэх киһи сөбүлээн, интэриэһиргээн туран кытынна.

Саха телевидениетын  быһа эфиригэр оонньуу тэрээһинэ, ыытыллыыта барыта орун-оннугар, ыытааччылар Туяра Павлова, Аскалон Семенов кыттааччыларга киэҥ-холку сыһыаннара киһи ыгылыйбакка, долгуйбакка толкуйдууругар кыах биэрдэ.

Үһүс түһүмэххэ киирбит дьон бэйэ — бэйэбитин кытта бодорустубут. Бу бырайыак салгыы ыытыллан, сайдан истэҕинэ, төрөөбүт литературабытын сэҥээрээччи, кэрэхсээччи элбиэ, төрөөбүт сахабыт тыла өлөн-сүтэн, симэлийэн биэриэ суоҕа этэ. Онон “Чолбон” сурунаалы сурутуҥ, ааҕыҥ диэн ыҥырабын. Биһиги ийэбит, аҕабыт саҕаттан биир да сыл быспакка суруттарбыппыт 60-ча сыл буоллаҕа буолуо.

 Мандарова Ульяна Дмитриевна, библиотекарь:

Бастаан күрэс туһунан ааҕан баран: «Кыттыахха сөп эбит дуу?”,- дии санаабытым, онтон ийэм доруобуйатын туруга мөлтөх диэн санаанан умна сырыттахпына, эдьиийгитин кытта кыттыа этигит диэн этии киирбитэ. Тутатына сөбүлэһэн улууска киирсибиппит. Кыайан, иккис турга ааспыппыт. Республика араас муннуктарыттан ааҕар дьиэ кэргэн мустубута долгутуулаах этэ. 2-с тур ыйытыылара ыарахан соҕус этилэр, айымньыны, суруйааччы айар үлэтин, тус олоҕун үчүгэйдик эрэ билэр киһи эппиэттиэх курдук этэ. 3-с турга телевидениеҕа өссө долгутуулаах этэ, ол эрээри ыытааччылар да, суоттуур хамыыһыйа холку көрүҥнэрэ долгуйууну суох оҥорбута. 4-с турга уустук ыйытыыларга түбэһэн олох да хааллыбыт дии санаабыппыт. Кыл мүччү утарылаһааччыларбытын куоһаран бастаабыппыт соһуччу этэ. Ийэм икки күнү быһа : “Эйигин ситиһии күүтэр”- диэн сулустар кэпсииллэрин ыыппыта ватсабынан. Онон сулустарга бастакыбын итэҕэйдим диэххэ сөп.

Венера Ходулова, 10 кылаас үөрэнээччитэ:

Олус наһаа үчүгэй, үөрдүм аҕай кыайбыппытыгар. Улахан аҥаарын Эдьиий Полина билэр этэ. Оҕолорго түһүмэххэ аахпыппын сороҕун өйдөөбөт этим, хартыыналар көмөлөспүттэрэ.