1 Звезда2 Звезды3 Звезды4 Звезды5 Звезд (1 оценок, среднее: 5,00 из 5)
Загрузка...
87 просмотров

Ксения Александровна Андросова аатынан остуоруйаһыттар ХХ күрэхтэрэ

К.А.Андросова аатынан остуоруйаһыттар, уус-уран ааҕыы XX куонкурса

Муус устар 9 күнүгэр педагогическай үлэ, тыыл бэтэрээнэ, Таатта улууһун Бочуоттаах гражданина Ксения Александровна Андросова аатынан алын кылаас үөрэнээччилэригэр остуоруйаһыттар, уус-уран ааҕыы күрэһэ  20-с төгүлүн буолла.

Куонкурус быйыл Баайаҕа оскуолатын выпускнига, Саха Сирин суруйааччыларын Сойууһун бырабылыанньатын  бэрэссэдээтэлэ,  “Чолбон” сурунаал бас эрэдээктэрэ, поэт, публицист  Гаврил Андросов — Хабырыыс Ондороос оҕолорго аналлаах  “Боотур буолуом”-уолаттарга хоһоон кинигэтинэн ыытыллынна.

Нэдиэлэ устата, үгэс курдук, оҕолор кинигэни кылааска аахтылар, библиотечнай уруоктарга сылдьан ааптар Гаврил Андросов, кинигэ иллюстрациятын оҥорбут арт-худуоһунньук Николай Мочкин туһунан биллилэр.  Бу икки талааннаах Баайаҕа ыччата оскуолаҕа маҥнайгы кылаастан  бииргэ үөрэммит, билигин аны айар эйгэҕэ бииргэ үлэлэһэр доҕордуулар буолалларын  оҕолор сэргээн, кэрэхсээн иһиттилэр.

20 сыллаах үбүлүөйдээх тэрээһини “Көмүлүөк күлүмэ” түмсүү ыытааччыта, литератураны ырытаччы, кыраайы үөрэтээччи  Маргарита Романовна Егорова хомоҕой тылынан иилээн-саҕалаан ыытта, бэтэрээн учууталлар ыҥырыылаах ыалдьыт буолан кыттыыны ыллылар. Полина Николаевна Кустурова тапталлаах учууталын туһунан кэпсээтэ,  оҕолор  библиотекаҕа сылдьан, кинигэ ааҕан билиилэрин хаҥаталларыгар баҕа санаатын тиэртэ. Маҥнайгы учуутал Екатерина Николаевна Луковцева  үөрэнээччилэринэн   киэн туттарын, “Боотур буолуом” кинигэ ис хоһооно, ойуута дьүөрэлии үрдүк таһымнаахтарын астынан бэлиэтээтэ.

 Оҕо искусствотын оскуолатын иитиллээччилэрэ хомус дьүрүскэн тыаһынан, ырыанан-тойугунан бырааһынньык түһүлгэтин киэргэттилэр. Нэһилиэк бибилэтиэкэрэ Учуутал   сырдык аатын үйэтитиигэ, үтүө киһи олоҕун холобурунан оҕону иитиигэ, сайыннарыыга туһуламмыт бырайыакка сүүрбэ сыл устата айымньылаахтык  бииргэ үлэлэһэр  оскуола учууталларыгар, библиотекарыгар Махтал Суруктары, өйдөбүнньүк буклеттары туттарда. Куонкуруска кыттыбыт оҕолор  К.А.Андросова кыыһа, САССР үтүөлээх учуутала  Розалина Ивановна Потапова  бэлэх кинигэлэрин ылан үөрдүлэр-көттүлэр.  Ксения Александровна сиэн балта Ксенья Александровна Андросова  Дэбдиргэттэн анаан-минээн кэлэн кыттыыны ылбытыгар махталбытын тиэрдэбит!

Кылаас оҕолоро Хабырыыс Ондороос “Боотур буолуом” кинигэтинэн  видеоролик оҥоруутугар уонна биирдии хоһоон ааҕааччы уус-уран ааҕыыга күрэхтэстилэр. 1 кылаас үөрэнээччитэ Андросова Арина куонкурсу таһынан “Мэник ньирэй”диэн сөбүлээбит хоһоонун  ааҕан иһитиннэрдэ.

Конон Кононович Мандаров, Саргылана Васильевна Жиркова, Инна Иннокентьевна Сыромятникова састааптаах дьүүллүүр сүбэ маннык түмүгү таһаарда:

Видеоролик куонкурса:

1 миэстэ — 1 кылаас   “Удьуор уус” хоһоонунан (кыл.сал. С.С.Сивцева)

2 миэстэ  — 2 кылаас  “Эһэм оҕуһа” ( Л.С.Белолюбская)

3 миэстэ – 3 кылаас “Удьуор уус” (Л.М.Тосина)

Биһирэбил – 4 кылаас “Эбэм куоската”( А.С.Тарасова)

Хоһоон ааҕыыта:

1 миэстэ – Охлопков Эрхан “Удьуор уус” хоһоон (1 кылаас)

2 миэстэ – Романов Рома “Үнүгэс” хоһоон (4 кылаас)

3 миэстэ —  Иванов Дамир “Боотур буолуом” (3 кылаас)

3 миэстэ – Слепцова Арина  “Эбэм куоската” (2 кылаас)

Кылаан кыайыылаах 1 кылаас К.А.Андросова көһө сылдьар мэтириэтин тутта, бу мэтириэт эһиилги күрэххэ дылы бастаабыт кылаас кабинетыгар көстүүлээх миэстэҕэ туруоҕа. Бырааһынньык түмүгэр учууталлар оҕолору, мустубут ыалдьыттары үбүлүөйдээх минньигэс кэрэ, уоттаах туордунан күндүлээтилэр.

   

 

Добавить комментарий

Ваш адрес email не будет опубликован. Обязательные поля помечены *