“Байаҕантай” информационнай киин

Планерка сонуннара

Бэс ыйын 2 күнэ, бэнидиэнньик

-Ыам ыйын 27 күнүгэр Баайаҕаттан дьаһалта, оскуола үлэһиттэрин эр дьонун биригээдэтэ Манчаары оонньууларыгар ыытыллар субботниктарга кыттыһан, А.Е.Мординов аатынан Тааттатааҕы лицейгэ 10 секциялаах сайыҥҥы душ тутуутугар үлэлээтилэр.

-Ыам ыйын 28 күнүгэр түөлбэлэринэн субботниктарга  көхтөөхтүк тахсан, техниканан бөх-сах свалкаҕа таһылынна.

-Ыам ыйын 30 күнүгэр  саха уус-уран литературата төрүттэммитэ 125 сылыгар, Аҕа дойдуну  көмүскээччилэр, Улуу Кыайыы 80 сылыгар аналлаах Библионочь буолан ааста. Манна норуот педагогикатыгар Өксөкүлээх, Мандар  Уус көрүүлэринэн лекциялары  Г.И.Неустроева, О.Н.Макарова оҥордулар, библиотекарь анал байыаннай дьайыыга Аҕа дойдуну көмүскээччилэргэ аналлаах кинигэлэри сырдатта, эмчиттэр С.В.Романова, М.Н.Перевалова дьон доруобуйатын көрдүлэр,  бастакы суһал көмөнү оҥорууну, кэрэ аҥардардарга аналлаах  сүбэлэри кэпсээтилэр. Оскуола библиотекара И.И.Сыромятникова Аҕа дойду Улуу сэриитигэр аналлаах викторина ыытта, хамаанданан  тыҥааһыннаах киирсии буолла. А.Н.Кустурова библиотека сайтыгар нэһилиэк Летопиһын суруйууга көмөлөрүн иһин Г.И.Неустроеваҕа, М.Р.Егороваҕа Махтал Суруктары туттарда. Таатта кииннээммит библиотечнай систематын библиотекардара оҥорбут хас биирдии  нэһилиэк Летопиһа куар кодтанан саҥардыллыбыт улуус   киирии Аартыгар угуллуо,  ыалдьыт, турист улууспут историятын кытта билсэр кыахтаныа. “Ньургуһун” оҕо уһуйаанын иитээччитигэр А.И.Неустроеваҕа нэһилиэк кырачааннара билии-көрүү аартыгар бастакы хардыылары оҥороллоругар библиотека литературатын туһанан айымньылаахтык үлэлиирин иһин “Бастаҥ ааҕааччы” Анал аат туттарылынна.

-Бэс ыйын 1 күнүгэр Аан дойдутааҕы  Оҕо көмүскэлин күнэ ыытылынна. Күнүс оҕолор компьютернай турнирга күрэхтэстилэр. Дьоро киэһэ кэнсиэригэр  уһуйаан иитиллээччилэрэ, оскуола оҕолоро уонна нэһилиэк уус-уран самодеятельноһа сүрдээх үчүгэй кэнсиэри бэлэхтээтилэр.  Биир дойдулаахпыт, поэт Гаврил  Андросов “Аҕа ырыата” хоһоонугар республикатааҕы ырыа айааччылар конкурстарын түмүгэ таҕыста, кыайыылаах Николай Протодьяконов (Нам) ырыата сүрэхтэннэ. Конкурс түмүгэ библиотека сайтыгар сиһилии сурулунна.

-Манчаары оонньуутугар хостескалар кэтэр таҥастарын саҥа талыллыбыт женсовет сүрүннээн, “Мандар Уус” кииҥҥэ иистэнньэҥнэр А.В.Луковцева, Е.Г.Мандарова көмөлөрүнэн эдэр ийэлэр тиктилэр. Санаттахха, бу кэрэ таҥас нэһилиэкпит талааннаах далбар хотуна А.В.Чурукова айбыт “Моҕол Ураһа”  моделынан оҥоһулунна.   Оонньууларга аналлаах нэһилиэккэ сүктэриллибит 160 олбох бэлэм буолла.

-“Мандар Уус” музей үлэһиттэрэ Моҕол Ураһаны абырахтыыллар, “Испэ туос” иистэнньэҥнэрэ манна анаан таспа туостары тигэн бэлэмнииллэр.  Кэлэр нэдиэлэҕэ балаҕан тутуутугар субботниктар ыытыллыахтара.

-Манчаары оонньууларынан турмаршрутунан үгүс турист кэлэрэ былааннанар, онуоха анаан түһэр, аһыыр дьиэни тэрийиигэ нэһилиэк урбаанньыттара үлэлэһэ сылдьаллар.

-Куула эҥэр ититии киллэриигэ “Альтернатива” тэрилтэ салалтата былырыын ыытыллыбыт үлэни көрде. Кэлэр нэдиэлэҕэ биригээдэ кэлэн  үлэлэрин салҕыахтара.

-Бу күннэргэ быһыт оҥоһуллуутугар үлэ барара былааннанар.