Гаврил Андросов “Аҕа ырыата” хоһоонугар ырыа айааччылар конкурстара түмүктэннэ

Баайаҕаҕа, бэс ыйын 1 күнүгэр,  Аан дойдутааҕы Оҕо көмүскэлин күнүгэр аналлаах дьоро киэһэҕэ,  биир дойдулаахпыт, Саха Сирин суруйааччыларын сойууһун бэрэссэдээтэлэ,  поэт Гаврил Андросов “Аҕа ырыата” хоһоонугар мелодия  айыыга туһуламмыт республикатааҕы  конкурс  түмүгэ таҕыста, кыайыылаах ырыата  сценаттан ылланна.

Конкурсу Баайаҕа модельнай библиотекатын “Көмүлүөк күлүмэ” литературнай түмсүүтэ уонна “Тускун” култуура-сынньалаҥ киинэ тэрийэн ыыттылар.  Күрэс  сыалынан  саха поэзиятыгар болҕомтону тардыы,  уус-уран литература уонна музыка көмөтүнэн иллээх ыалы, тапталы туойар саҥа айымньыны үөскэтии, айар талааннары булуу,  киэҥ эйгэҕэ таһаарыы буолар. Күрэскэ  Дьокуускайтан, Намтан, Уус  Алдантан уонна  Тааттаттан  айар куттаахтар кытыннылар.  Дьүүллүүр сүбэҕэ  СР култууратын туйгуна,  нэһилиэк хорун, ырыа ансаамбылларын салайааччыта  М. Н.Потапова, СР култууратын туйгуна, уһун сылларга И.Д.Христофоров аатынан Баайаҕа музыкальнай оскуолатын салайбыт  З.С.Луковцева, “Тускун” култуура киинин директора Д.Д.Апросимов, уус-уран салайааччы С. Н. Федорова, “Көмүлүөк күлүмэ” литературнай түмсүү салайааччыта  А.Н.Кустурова үлэлээтилэр. Дьүүллүүр сүбэ күрэскэ таһымнаах үлэлэр киирбиттэрин бэлиэтээтэ: тапталга сууламмыт дьоллоох о5о саас, биһик ырыатын намыын матыыба, аҕа амарах тапталын иэйиитэ  буолан дьоһун ырыалар  айыллыбыттар.

 Конкурс түмүгэ :

I Үрдэл — Николай Протопопов, Нам. 10 000 харчынан бириэмийэ.

II Үрдэл — Сергей Протопопов, Дьокуускай куорат.  Баайаҕа уустарын быһаҕа.

III  Үрдэл — Матрена Ермолаева, Дэбдиргэ.  5000  сууммалаах Сертификат.

Автор Гаврил Андросов  Биһирэбилэ — Валерий Данилов, Уус Таатта. 5000 сууммалаах Сертификат.

         Бастакы Үрдэли ылары ситиспит Николай Протопоповка уонна поэт Биһирэбилин  ылбыт Валерий Даниловка  Гаврил Андросов “Аҕа ырыата” хоһооно киирбит  “Сир түннүгэ”  кинигэтин автографтаан  бэлэхтиир.

Күрэскэ кыттыыны ылбыт бары айааччыларбытыгар дириҥ махталбытын тиэрдэбит, эһиги кэрэнэн олоҕу уһансар айымньылаах үлэҕитигэр саҥа саҕахтары, үрдүк ситиһиилэри, бары үтүөнү баҕарабыт!

Баайаҕа Томторо, бэс ыйын 3 күнэ, 2025 сыл.