Педагогическай  үлэ, тыыл бэтэрээнэ, Таатта улууһун Бочуоттаах гражданина К. А.  Андросова аатынан  уус-уран ааҕыы күрэһэ быйыл Улуу Кыайыы 80 сылыгар ананна.

 Быйылгы куонкурус уратытынан күрэхтэһиигэ биирдиилээн буолбакка, бөлөҕүнэн  кытыннылар, оҕолор поэттар айымньыларын уус-ураннык ааҕыыга күрэхтэстилэр. 4 кылаас үөрэнээччилэрэ  Анастасия Егорова “Дьоруойдар күннэрэ”  өрө күүрүүлээх хоһоонунан кыттан 1 бочуоттаах миэстэни ыллылар,  саха народнай поэта, кыайыылаах көлүөнэ сорҕото Күннүк Уурастыырап “Күндү кыайыы күнэ” хоһоонун толорон 2 кылаас үөрэнээччилэрэ   2-с миэстэни ситистилэр. “Кыайыы күнэ”  айымньыны ис хоһоонун үчүгэйдик тиэрдэн  3  кылаастар 3-с,   маҥнайгы кылаастар биир дойдулаахпыт Надежда Андросова — Айтылы “Малгиннар тыыннаахтар” хоһоонун  толорон биһирэбил  миэстэлэри ыллылар. Бырааһынньыкка К.А.Андросова сиэн балта Ксения Александровна Андросова ыалдьыттаата, Андросовтар учуутал династияларын бирииһин    төрдүс, иккис кылаас үөрэнээччилэригэр, бастыҥ уруһуйдьут Мандарова Айаанаҕа туттарда.

Аҕа дойду Улуу сэриитин, Улуу Кыайыыны дьүһүйэн көрдөрөр уруһуй куонкурсун түмүгэ маннык таҕыста:  Мандарова Айаана (3 кылаас) — 1 миэстэ, Эмма Протодьяконова (4 кылаас) -2 миэстэ, Варламова Диана -(4 кылаас) 3 миэстэ, Андросова Алина (2 кылаас) — биһирэбил.

Күүтүүлээх Кыайыыны тыл күүһэ эмиэ турууласпыта, сэрии кэмигэр айыллыбыт хоһооннор, ырыалар норуоту Кыайыыга кынаттаабыттара. Оҕолор саха дьонун  сүрдэрин көтөхпүт “Хайыһар” ырыаны уонна чулуу көлүөнэ чиэһигэр айыллыбыт   нууччалыы, сахалыы ырыалары  ыллаан иһитиннэрдилэр.  Оҕо искусствотын оскуолатын театральнай отделениетын уһуйуллааччылара фронтовик поэт Макар Хара  “Тахса сылдьыый, Тааттабар” айымньытынан  сүрдээх үчүгэй дьүһүйүүнү көрдөрөн тэрээһини киэргэттилэр.

Үгүс көлүөнэ оҕо аймах тапталлаах учуутала, оҕону ааҕыы умсулҕаннаах эйгэтигэр кэрэ кэпсээннэринэн сирдээн киллэрбит  уһулуччулаах педагог Ксения Александровна Андросова умнуллубат үтүө  аата 21-с төгүлүн бу курдук оҕо чаҕаан саҥатыгар кыттыста, ырыатыгар -хоһоонугар холбосто.

.К.А.Андросова, Таатта буойун суруйааччыларын туһунан библиотечнай уроктар ыытылыннылар.

Оҕолор хоһооннорун, ырыаларын , хаартыскалары библиотека телеграм каналыгар көрүҥ.