“Байаҕантай” информационнай киин

Планерка сонуннара

Ыам ыйын 19 күнэ

• Ыам ыйын 15 күнүгэр, Аан дойдутааҕы Дьиэ кэргэн күнүгэр, “Далбар”- нэһилиэк дьахталларын общественнай түмсүүтэ  үлэтин түмүктээн, саҥа талыллыбыт састаапка  үлэ тэһиинин туттарда.   СР доруобуйатын харыстабылын туйгуна, Саха сирин дьахталларын X съеһин делегата Любовь Николаевна Тимофеева  салайааччылаах түмсүү 27 сыл устата  оҕо-дьахтар, дьиэ кэргэн политикатыгар  ыытыллар дьаһаллары олоххо киллэриигэ киэҥ далааһыннаахтык, айымньылаахтык  үлэлээтэ, республика таһымнаах көрүүлэргэ кыттан үгүс ситиһиилэннэ. Дьаһалта баһылыгын     солбуйааччы А.А.Николаева түмсүү кыттыылаахтарыгар  нэһилиэк социальнай-экономическай, култуурунай-духуобунай сайдыытыгар кылааттарын иһин  Махтал Суруктары туттарда.  Тэрээһиҥҥэ ыытыллыбыт  үлэни хаартысканан көрдөрөн сырдатыы, уопуту үллэстии, сандалы тула олорон истиҥ кэпсэтии, сүбэ-саргы, хаартыскаҕа түһүү буолла.  Дьахталлар общественнай түмсүүлэрин саҥа састаабыгар С.В.Романова — бэрэссэдээтэл, А.А.Попова, К.А.Слепцова, С.С.Накатова, М.Т.Пинигина, П.М.Лазарева, С.С.Потапова, С.К.Мярина, Т.А.Апросимова, Ч.А.Романова киирдилэр. Көлүөнэ ситимин салҕыыр далбар хотуттарбытыгар ситиһиилээх үлэни баҕарабыт!
• П.П.Бурнашева “Испэ туос” түмсүү иистэнньэҥнэрэ Улуу Кыайыы 80 сылынан Аллараа Бэстээххэ   сэриигэ аттаммыт саллааттар ытык сирдэригэр сүгүрүйүү тэрээһинигэр  “Туос тууйастар”  акцияҕа кыттыһан  5  тууйаһы бэлэмнээбиттэрин иһитиннэрдэ.
• Ыам ыйын 21 күнүгэр И.Д.Христофоров аатынан Оҕо искусствотын оскуолатын отчуоттуур кэнсиэрэ.
• Ыам ыйын 24 күнүгэр Сайыны көрсүү дьоро киэһэтэ.
• Ыам ыйын 27 күнүгэр — бу дьыл балаҕан ыйын 14 күнүгэр ыытыллыахтаах быыбарга нэһилиэк Сэбиэтигэр депутаттары талыыга 38 выборщик кыттыылаах праймериз. Түөлбэттэн 3-түү депутат талыллар.
• Бу нэдиэлэҕэ ыһыах түһүлгэтигэр субуотунньуктар ыытыллыахтара.