“Байаҕантай” информационнай киин

Планерка сонуннара

Ыам ыйын 12 күнэ

• Ыам ыйын 8-9 күннэригэр нэһилиэккэ Улуу Кыайыы 80 өрөгөйдөөх сылын бэлиэтиир тэрээһиннэр маннык тосхолунан ыытылыннылар: Ыам ыйын 8 күнэ: “Кыайыы кынаттаахтар” – холбоһуктаах тэрилтэлэр театрализованнай туруоруулара.

Ыам ыйын 9 күнэ: “Кыайыыга кынаттыыр ырыалар” — оскуола үөрэнээччилэригэр ырыа көрүүтэ, байыаннай строевой хаамыы.

Парад, өлбөт-сүппэт полк хаамыыта.

Өйдөбүнньүк сквергэ  митинг,  “Саллаат хааһыта”.

“Өйдүүбүт! Сүгүрүйэбит!Криэстиибит! – тыыл бэтэрээннэригэр, сэрии сылын оҕолоругар сандалы.

“Хобороос” драматическай поэматтан быһа тардан туруоруу.

“Ким да умнуллубат, туох да умнуллубат!”кэриэстэбил чүмэчи ууруута.

Улуу Кыайыыны уһансыбыт,  Кыайыы илдьитин эт кулгаахтарынан истибит, үлүскэннээх үөрүү өрөгөйүн эттэринэн-хааннарынан  билбит  бэтэрээн дьоммут кэккэлэрэ олох кытаанах сокуонунан чарааһаан иһэр. Кинилэргэ саамай  дьоллоох, күндүттэн күндү, ытык күнү  биһиги нэһилиэктэн  тыыл бэтэрээннэрэ Малгин Семен Семенович, Неустроева Александра Андреевна, Христофорова Александра Алексеевна;  сэрии тулаайахтара,  сэрии сылын оҕолоро: Винокуров Семен Прокопьевич, Скрябина Июлия Николаевна, Иванов Семен Семенович, Андросова Дария Иннокентьевна,Андросова Татьяна Игнатьевна, Белолюбскай Андрей Егорович, Кустурова Евдокия Николаевна, Мандаров Дмитрий Афанасьевич, Тимофеева Марина Николаевна, Чахов Юрий Павлович, Дедюкина Анна Ефремовна, Луковцева Мария Михайловна, Гаврильева Марфа Афанасьевна, Неустроев Борис Федорович, Христофоров Иван Христофорович, Куличкина Татьяна Афанасьевна, Февронья Терентьевна, Петр Петрович Степановтар,  Молчанова Дина Николаевна   көрсөллөр.  Кыайыы үбүлүөйдээх бырааһынньыгынан баһылык А.Р. Романов республика, улуус, нэһилиэк салалтатын аатыттан Эҕэрдэ суруктары, бэлэхтэри туттарда.  Кыайыы иһин олохторун толук уурбут, сырдык хааннарын тохпут, хабыр хапсыһыылартан тыыннаах орпут, тыылга тоҥмут-хаппыт, эйэлээх олоҕу туппут эһэлэрбит, эбэлэрбит, ийэлэрбит-аҕаларбыт, хаан-уруу дьоммут сырдык ааттара умнуллубат!

 Аан дойду историятыгар саамай элбэх хаан тохтуулаах, сүүһүнэн мөлүйүөн дьон дьылҕатын умсарыта уурталаабыт, үгүс элбэх норуоттар түөрэхтэрин түҥнэритэ түһэртээбит  алдьархайдаах сэрии иэдээнин  үүммүт үйэ мэлдьэһэр,   кырыктаах сэрии адьарай уотун уматар. Күн бүгүн биһиги дойдубут эмиэ тэргэн саа эстэр былдьаһыктаах кэмигэр олорор.  Анал байыаннай дьайыыга  Ийэ дойду иннигэр ытык иэстэрин толорор биир дойдулаахтарбытын умнубаппыт.  А.Р.Романов буойун дьоммут  дьиэ кэргэттэригэр Махтал Суруктары, бэлэхтэри  туттарда. Биһиги, Улуу Кыайыы көлүөнэтин  нэһилиэнньиктэрэ — оҕолоро, сиэннэрэ, хос сиэннэрэ —  кинилэр турууласпыт кырдьыктарын туһугар  Кыайыы биһиэнэ буоларыгар  итэҕэйэбит!  Итэҕэйэбит,  “өлөрү өйүнэн кыайбыт” киһи-аймах иэдээннээх сэриини тохтотон Сир үрдүгэр Эйэ үйэлэргэ туругуруон! Кыайыыбыт кыайыыны түстээтин!

Кыайыы бырааһынньыгын хаартыскалара, видеолар куйаар ситиминэн киэҥник тарҕаннылар,  дьон-сэргэ  үөрдэ – көттө, сүргэтэ көтөҕүлүннэ.

-Ыам ыйын 7 күнүгэр Бититтимэҕэ ландшафтнай баһаар тура сырытта,  хомуур  суһаллык ыытыллан,  этэҥҥэ умулунна.  3 га иэннээх уоту умуруорууга МПЧ сэттэ үлэһитэ,  нэһилиэк баһаарынай дружинатыттан алта, олохтоохтортон  22 киһи кытынна.   Нэһилиэк олохтоохторо сэрэхтээх буолуулара ирдэнэр. Уоту ыыппыт эппиэтинэһи сүгэрин, хоромньуну төлүүрүн умнумаҥ!

— Ыам ыйын 1 күнүгэр тэрилтэлэринэн үлэ субуотунньуктара буолбуттара, бу күннэргэ ыаллар тэлгэһэҕэ, сыһыары сытар уулуссаларга ырааһырдыы үлэтин  салҕыыргытыгар. Ньукуолун кэннэ техникалаах субуотунньуктар былааннаналлар.

-Ыам ыйын 17 күнүгэр И.Д.Христофоров аатынан  Искусство оскуолатын иитиллээччилэрин отчуоттуур кэнсиэрэ ыытыллар.

Литература сонуна:

 Биир дойдулаахпыт, Саха сирин Суруйааччыларын сойууһун  бэрэссэдээтэлэ Гаврил Андросов-Хабырыыс Ондороос “Муздак муҥ” (“Муустаах муҥ”- “Леденящая грусть”) кинигэтэ казахтыы тылынан “Фолиант” кинигэ кыһатыгар бэчээттэнэн таҕыста. Кинигэ биһирэмэ Казахстан Астана куоратыгар Евразиятааҕы кинигэ быыстапкатын чэрчитинэн ыытылынна, манна Азия эрэгийиэннэрин кинигэ кыһаларын бэрэстэбиитэллэрэ кытыннылар.