“Байаҕантай” информационнай киин

Планерка сонуннара

Муус устар 21 күнэ, бэнидиэнньик

-Оскуола директора Е.И.Хатылаева Улуу Кыайыы 80 сылынан муус устар 9-15 күннэригэр  “ Кыайыы десана” диэн Баайаҕа оскуолатын оҕолорун бөлөҕө “Москва-Санкт Петербург-Старай Русса” маршрутунан сырыыларын кэпсээтэ. “Кыайыы десана” Ытык Ийэ Ф.Н.Малгина ааспыт үйэ 60-с сылларыгар уолаттара сэриилэспит сирдэринэн баран кэлбит суолун хатылаата: оҕолор Герой куорат Ленинградка, Улуу Новгородка Ильмень Күөлгэ,  Старай Руссаҕа — Ийэ дойду көмүскэлигэр күөннэринэн түспүт саха саллааттарын сырдык кэриэстэригэр сүгүрүйдүлэр, олохтоох музейга Ытык Ийэ, бырааттыы Малгиннар  тустарынан матырыйааллары бэлэхтээтилэр.  Старай Руссаҕа ыраах  Саха Сириттэн тиийбит делегацияны сэлиэнньэ баһылыга көрсүбүт.  Оҕолор дойдубут  тэбэр сүрэҕэр баар “Музей Победы” — сэрии хас биирдии  1418  күнүн көрдөрөр баараҕай комплексы көрөн Аҕа дойду Улуу сэриитин туһунан билиилэрин хаҥаттылар. Москваҕа, Питергэ бу куораттарга  олорор, үөрэнэр  Таатта  ыччата   гидтиир эбит, ол курдук биир дойдулаахпыт Антонина Афанасьевна Стручкова (Андросова) сиэнэ Антон Стручков, Санкт-Петербург үрдүк үөрэҕин 3 курсун студена,  оҕолорго куораты көрдөрбүт.

— Улуу Кыайыы 80 сылынан  учаастактааҕы балыыһа коллектива эмчит тыыл бэтэрээннэригэр Кэриэстэбил тэрээһин ыытта. А.Д.Андросова, А.Р.Рахлеева, А.С.Дедюкина, М.В.Бурнашева, А.С.Хочоенова, В.Е.Кириллина  туһунан ахтан-санаан аастылар.

— Нэһилиэнньэҕэ социальнай контракт  комиссията буолан ааста, 2 баҕалаах киһи кытынна, салгыы улуус  көрүүтүгэр барда.

— Сааскы халаан  уутун сэрэтэр комиссия үлэтин саҕалаата.

— Спорт сонуннара: мас тардыһыытыгар Чөркөөх маастардарын бирииһигэр республикатааҕы күөн күрэскэ Сахаян Матаннанов, Семен Винокуров — 1, Рустам Андросов, Дьулусхан Неустроев, Ньургун Неустроев -2,  Сулус Романов, Мичил Мандаров – 3 миэстэлэри ылан, Баайаҕа  оскуолатын хамаандата ситиһиилээхтик кытынна. Тренер – Михаил Попов.

— Кыһыны атаарыы тэрээһиннээхтик ааста, тэрилтэ үлэһиттэрэ, түөлбэ олохтоохторо көхтөөх кыттыыны ыллылар.