«Байаҕантай” информационнай киин

Планерка сонуннара

Муус устар 14 күнэ, бэнидиэнньик

— Баһылык солбуйааччыта А.А.Николаева муус устар 9 күнүгэр Дьокуускайга ыытыллыбыт Мандар Уус үбүлүөйүнэй хамыыһыйатын  кытта үлэлээһиигэ  Правительство бэрэссэдээтэлэ К.Е.Бычковтуун ВКС нөҥүө мунньаҕы сырдатта. Кирилл Евгеньевич киирбит этиилэри өйүүрүн биллэрдэ, Программалар  нөҥүө  үлэлэһэргэ министерстволарга сорудах биэрдэ. Ааспыкка сырдатыллыбыт икки уопсай дьиэ, балыыһа тутуута, Моҕол Ураһаны тас өттүн бүрүйүү, Мандар кииҥҥэ штат туруорсуу, агротуризмы сайыннарыы, НПК, документальнай киинэ устуута уо.д.а. боппуруостар тула кэпсэтии барда. Маны таһынан үөрэх миниистирэ Нь.А. Соколованы кытта нэһилиэк салалталара, үөрэх управлениета көрсөн, “Мандар кыһата” республикатааҕы сылы эргиччи үлэлиир лааҕыры туруорсан кэпсэттилэр. Любовь Андросова эмтэниитигэр көмөҕө ыытыллыбыт  “Сүрэхпит сылааһынан”  аһымал кэнсиэргэ 610.000 киирдэ, үгүс көмө оҥоһуллубутун ааҕа-билэ олороҕут, биир дойдулаахтарбытыгар түмсүүгүт иһин  дьаһалта аатыттан махталын биллэрдэ.

-Улуу Кыайыы 80 сылынан Томторго турар Өйдөбүнньүк комплекс саҥардыллан оҥоһуллуутугар үлэ барар. Саҥа  биллибит чахчыларынан 79 буойун сэрии толоонугар охтубут, 74 кыайыы көтөллөөх эргиллибит. Буойун дьоммут хаартыскалара  аныгы үйэлээх матырыйаалга көһөрүллэн оҥоһуллуохтара.

-Муус устар 10 күнүгэр Ытык Күөлгэ “Таатта Пионерията” кинигэ биһирэмэ буолан ааста. Нэһилиэк дьаһалтата үйэтитии кинигэтин хомуйан оҥорбут Л.А.Аввакумоваҕа, пионербаһаатайдарга Т.И.Андросоваҕа, Л.И.Дедюкинаҕа Бочуотунай Грамоталары туттарда. Татьяна Игнатьевнаҕа “Пионервожатый юбилейного года” диэн улуус баһылыгын Анал аата иҥэрилиннэ. Кинигэҕэ биһиги оскуолабыт пионериятын Татьяна Игнатьевна суруйан бэлэмнээтэ. Нэһилиэк оҕото-ыччата сайдыытыгар, дойдутун таптыыр, бэриниилээх буола иитиллэн тахсыытыгар  сүҥкэн кылааты киллэрбит  пионербаһаатайбыт Т.И.Андросова  пионер оҕолор ортолоругар  ыыппыт ирдэбил үлэтиттэн саҕыллан, кини муспут баай нэһилиэстибэтигэр тирэҕинэн   Баайаҕабыт  историята сурукка-бичиккэ тиһиллэр, кинигэ буолан  үйэтийэр. Лариса Александровна  нэһилиэк библиотекатыгар баайаҕалар  үчүгэй үлэлээххит, элбэх кинигэни оҥорон таһаараҕыт диэн махтал тыллаах  “Таатта Пионерията” кинигэтин бэлэхтээтэ.

— Муус устар 12 күнүгэр Баайаҕаттан тардыылаах, быыһааччы идэлээх Россия суруйааччыларын Сойууһун чилиэнэ Валерий Андросов өбүгэлэрин дойдутугар олоҕун аргыһа Оксана Афанасьевналыын  ыалдьыттаата, кинилэри Дойдулаах Суор-Гаврил Андросов тэрийэн аҕалла. Бу туһунан сиһилии  сайтка тахсыаҕа.