Хаһан эрэ, төгүрүк араадьыйанан космоска киһи көттө диэн истибиппит. Ити иннинэ космос диэн тылы араадьыйаттан, били ааҕарбыт туомунан хаһыаттартан билэрбит. Маҥнай сэбиэскэй спутник тахсан көппүт, сигналлыы-сигналлыы, ону Эмиэрикэ куһаҕан капиталиһа небоскребун үрдүттэн телескобунан көрбүт уонна кыһыытыттан онно өлөн хаалбыт диэнэ өссө шарж курдук өлө сытар урууһуйа кытта баара. Онтон сэбиэскэй ыттар көппүттэрэ иккитэ быһыылааҕа, биирэ табыллыбатах курдуга, оттон Белка уонна Стрелка диэннэр төттөрү түспүттэрэ. Хаһыат барыта Белка, Стрелка буолбуттара, сорох омуннаахтар оҕолорун кытта ааттаабыттар диэн баара.

Оруобуна бу күн Гагарин көппүт диэн:  “Работают все радиостанции Советского Союза, слушайте важное сообщение ТАСС..”- диэнтэн саҕалаан сотору- сотору биллэрбиттэрэ. Арааһа, биир уруок үөрэммэккэ дьоллоннубут быһыылааҕа. Первэй Маайга диэри кэлбит хаһыаттартан Гагарин  портретын кырыйан табаар дьааһыгын хортуонугар сыһыаран, кыаллар өттө ракета папье машенан оҥорон параакка туппуппут, ура диэбиппит, Гагарин диирбит, тоҕо эрэ Хрущев диэн хаһыы баарын өйдөөбөппүн.

Оннук этэ муус устар, ыам ыйын 1961 сааскы күннэрэ .

Бүөтүр Чээрин