“Байаҕантай” информационнай киин

Планерка сонуннара

Муус устар 7 күнэ, бэнидиэнньик

-Муус устар  3-6 күннэригэр Москваҕа ыытыллыбыт норуоттар икки ардыларынааҕы “Клинок” быыстапкаҕа Баайаҕа уустара ситиһиилээхтик кытыннылар.   Протопопов Анатолий Леонидович “Полевой кухонный нож” – 1 миэстэ, Неустроев Иван Иванович “Полевой кухонный нож” – 2 миэстэ, Христофоров Михаил Иванович “Короткий кухонный нож” – 1 миэстэ, Андросов Иван Анатольевич “Национальный нож” – 2 миэстэ, Неустроев Иван Иванович “Национальный нож” – 3 миэстэ буоллулар.  Уустар маны тэҥэ  дойду киин куоратыгар баар мастерскойдарга сырыттылар, саха быһаҕын охсууга маастар-кылаас ыыттылар.

— А.Р. Романов Б.Ф.Неустроев-Мандар Уус үбүлүөйүн көрсө ыытыллар үлэлэргэ туруорсуулары кэпсэтиһэ сэттэ министерствоҕа буолбут дьыалабыай көрсүһүүлэри кэпсээтэ. Баһылык нэһилиэкпит уус түөлбэтин быһыытынан  салгыы сайдыытыгар олох араас салаатын кэлимник көрөн үлэни тэрийиигэ ыытыллар дьаһаллар боппуруостарын тула кэпсэттэ. Ол иһигэр Мандар оскуолата, агротуризм, суолу республика көрүүтүгэр киллэрии,  модульнай балыыһа, кэлии специалистарга уопсай дьиэ  тутуута уо.д.а. киирдилэр.  Кэпсэтиилэр көдьүүстээхтик барбыттарын, олоххо киириилэригэр ыйыы-кэрдии, сүбэ-соргу ылбытын эттэ. Үгүстэн күүтүүлээх өттүн сырдаттахха, бу күннэргэ улуус баһылыгын эбээһинэһин толорооччу  Р.И.Захаров, биир дойдулаахпыт Иннокентий Михайлович Андросов  Правительство председателин бастакы солбуйааччы Д.Д.Садовников мунньаҕар суол боппуруоһун  туруораллар, “Үтүө дьыала” салайааччыта А.А.Петров уопсай дьиэ тутуутугар ылсарын, доруобуйа харыстабылын министрэ Л.М.Афанасьева балыыһа тутуута 2026 сылга  турарын эппит.

-Муус устар 5-6 күннэригэр Ньурба улууһугар республикатааҕы мас тардыһыы күрэһэр Неустроев Ньургун (10 кылаас) 3 миэстэни ылла, икки күннээх тыҥааһыннаах киирсии түмүгүнэн Семен Винокуров (9 кыл.), Рустам Андросов (8 кыл.) , Ньургун Неустроев Манчаары оонньууларыгар путевка ылары ситистилэр ( тренер М.А.Попов).  Эдэр мадьыныларбытыгар  хаалбыт кэмҥэ күүстээхтик бэлэмнэнэн улууспут, нэһилиэкпит аатын чиэстээхтик көмүскүүллэригэр баҕарабыт!