“Байаҕантай” информационнай киин

Планерка сонуннара

Кулун тутар 31 күнэ, бэнидиэнньик

Кулун тутар 24-25 күннэригэр П.А.Ойуунускай төрүттээбит Тыл уонна култуура института тэриллибитэ 90 сылынан Тааттаҕа Гуманитарнай  чинчийии уонна хотугу аҕыйах ахсааннаах омуктар проблемаларын институтун күннэрэ буолла. Иккис күннэригэр 16 киһилээх делегация  Баайаҕаҕа ыалдьыттаата. Олоҥхо балаҕаныгар төгүрүк остуол ыытылынна, Мандар Уустуун көрүстүлэр, кэпсэттилэр, этнологическай  музейы көрдүлэр. Оскуолаҕа историческай наука кандидата В.Е.Васильев “Саха төрүт итэҕэлэ. Сэргэ туруоруу сиэрэ-туома”, филологическай наука кандидата О.И.Чарина “Участие Чариных в ВОВ”  лекциялары аахтылар, учуонайдар НПК суруйуутугар индивидуальнай консультациялары биэрдилэр.  Нэһилиэк дьаһалтата, оскуола салалтата биир дойдулаахпыт, Баайаҕа оскуолатыгар үөрэммит, үлэлээбит, үгүс көмөнү оҥорбут  педагогическай наука кандидата, номох буолбут үөрэх инспектора   И.И.Чарин кыыһыгар Ольга Иосифовнаҕа  махтал суруктары, өйдөбүнньүк кинигэлэри туттардылар,  ыалдьыттар институт таһаарбыт кинигэлэрин бэлэх ууннулар.

— Кулун тутар 29 күнүгэр Ытык Күөлгэ Улуу Кыайыы 80 сылыгар аналлаах “Түмсүү-төлкө төрдө” улуустааҕы көрүү-фестиваль гала кэнсиэрэ буолла, түмүк таҕыста. Биһиги нэһилиэк 2 — с бочуоттаах миэстэни ылан, 60.000 солк. наҕараадаланна. Марита Потапова салайааччылаах эр дьон хора “Бастыҥ  хор”,   Афанасий Никитин “Бастыҥ тойук”, Чэмэлиинэ Романова “Бастыҥ сувенир” анал ааттарынан бэлиэтэннилэр.

-Сцена ветерана, талааннаах үҥкүүһүт Виктор Марковка аналлаах “Үҥкүү — олоҕум дьоло” диэн Дэбдиргэҕэ ыытыллыбыт  улуустааҕы үҥкүү күрэһэр “Үрүйэ” үҥкүү ансаамбыла  “Кылаан чыпчаал” үрдүк аатын сүктэ, Ольга Бурнашева индийскэй үҥкүү конкурсугар 1 миэстэни ылла.

— Люберцы куоракка ыытыллыбыт мас тардыһыыга Россия чемпионатыгар Константин Жирков 3 бочуоттаах миэстэни ылла.