“Байаҕантай” информационнай киин

Планерка сонуннара

Кулун тутар 10 күнэ, бэнидиэнньик

• ОДЬКХ Баайаҕатааҕы учаастагын маастара О.С.Андросов иһитиннэриитинэн,  республикаҕа чоҕу таһыыга үөскээбит тыҥааһыннаах  быһыы-майгы түмүгэр мантан ыла температурнай режим көрүллүбүт графигынан оттуллар, ол эбэтэр ыраах сытар кытыы дьиэлэри сылытаары күҥҥэ 22 тоннаны отто олорбут эбит буоллахтарына, график быһыытынан  аны 19 тоннаны оттуохтара, дьиэлэр сөрүүкүөхтэрин сөп. Билигин чох саппааһа — 520 тонна үчүгэй, 200 тонна куһаҕан хаачыстыбалаах, бу биир ый оттуллар саппаас.

• Тыа хаһаайыстыбатын специалиһа А.В.Хатылаев сүөһү төбөтүгэр субсидияҕа үп министерствотын 2023-2024 сс. бэрэбиэркэтин түмүгүн кэпсээтэ, биһиги нэһилиэккэ кэһии суоҕа бэлиэтэннэ. 2023 с. Федеральнай сокуонунан сүөһү төбөтүгэр субсидия от, аһылык атыылаһыытыгар көрүллэринэн, 2.5 гаттан ордук сирдээхтэргэ бэриллибэтин иһитиннэрдэ. Үүккэ көрүллэр харчы субсидията 75 солк. буолбут, аны “Баай ас” кооператив төһөнү төлүүрэ быһаарыллыахтаах.

• Кулун тутар 4-5 күннэригэр Ытык Күөлгэ грант суруйууга проектнай мастерскойга дьаһалтаттан, оскуолаттан кыттыыны ыллылар. Инникитин нэһилиэк сайдыытыгар граҥҥа үлэ күүһүрүөҕэ.

• Кулун тутар 6 күнүгэр анал байыаннай дьайыыга хорсуннук сэриилэспит буойун ыччаппыт, “Эр санаа” орден кавалера Василий Андросов кэриэһигэр ыытыллыбыт  байыаннай-патриотическай  оонньууларга   оскуола 5-11 кылааһын үөрэнээччилэрэ 4 хамаанданан арахсан 6 түһүмэхтээх күрэхтэһиигэ  дьаныардаахтык кытыннылар, кыайыыга дьулуурдарын көрдөрдүлэр. Күрэх кылаабынай судьуйатынан бииргэ үөрэммит доҕоро,  анал байыаннай дьайыы бэтэрээнэ, старшай лейтенант,  Таатта, Чурапчы улууһун байыаннай комиссариатын сүрүн көмөлөһөөччүтэ  Роберт Афанасьевич Винокуров, судьуйаларынан Баайаҕа МПЧ-6 тэрилтэ үлэһиттэрэ үлэлээтилэр.   Василий Гаврильевич төрөппүттэрэ, бииргэ төрөөбүттэрэ, бииргэ үөрэммит доҕотторо, нэһилиэк дьаһалтата, ЖКХ, “Баай маркет”, “Татьяна” маҕаһыыннар,  МПЧ-6, балыыһа, музей, ДШИ, “Тускун” култуура киинэ, Саҥа Куула олохтоохторо  күрэхтэһии ыытыллыытыгар күүс-көмө буоллулар.

• Кулун тутар 6 күнүгэр А.Е.Мординов аатынан лицейгэ Россия суруйааччыларын Сойууһугар киирбит биир дойдулаахтарбыт : литературнай критик Ольга Макарованы, драматург Утум Захаровы, прозаик Валерий Андросовы төрөөбүт улуустарыгар көрсүһүү буолан ааста. Баайаҕаттан делегация киирэн “Көмүлүөк күлүмүттэн” Россия суруйааччыларын сойууһугар киирбит  Ольга Николаевнаны тэрээһиҥҥэ кэлбит суруйааччылар, улуус общественноһын, ааҕааччыларын иннигэр сырдатан, махтанан, эҕэрдэлээн кэллэ.

• Кулун тутар 8 күнүгэр Баайаҕа талааннаах ырыаһыт уолаттара кэрэ аҥардарга бырааһынньык кэнсиэрин бэлэхтээтилэр, көрөөччүлэр астынан-дуоһуйан тарҕастылар.

• Кулун тутар 9 күнүгэр көһө сылдьар Ньурба драмтеатра гастроллаата, оҕолорго С.Козлов “Тили-мили трямдия” остуоруйаны, улахан дьоҥҥо калмык суруйааччыта А.Балаконов “Ийэ сүрэҕэ” айымньытынан спектаклын сахалыы тыыннаан көрдөрбүттэрэ дьон биһирэбилин ылла.

• Кулун тутар 13 күнүгэр ССРС спордун маастара Константин Луковцев төрөөбүтэ 80 сылыгар аналлаах Олоҥхо балаҕаныгар улахан быыстапка,  оҕолорго  көҥүл тустууга улуустааҕы күрэхтэһии тэриллиэҕэ.