Баайаҕа Өрөгөй ырыата

Олунньу 26 күнүгэр  Баайаҕа нэһилиэгин Сэбиэтин депуттарын уочараттаах сессията историческай суолталаах  Быһаарыыны (Решение) ылынна.  Бу күн, 2025 сыл  олунньу 26 күнүгэр,  Баайаҕа нэһилиэгин  Өрөгөй ырыата  бигэргэннэ.

Гимн автордара  биир дойдулаахтарбыт — поэт Гаврил Андросов, мелодист Станислав Луковцев.

2019 сыл тохсунньутугар “Баайаҕа нэһилиэгэ” МТ дьаһалтата нэһилиэк Гимнэ буолар хоһоону айыыга сабыылаах конкурс биллэрбитэ. Биэс пууннаах балаһыанньа сүрүн ирдэбиллэринэн күрэскэ биир дойдулаахтарбыт эрэ кыттыылара, хоһоон   уус-уран, ааҕыллымтыа, ырыаҕа барсар, Баайаҕа нэһилиэгин бары эйгэтин уус-уран тылынан  уобарастаан итэҕэтиилээхтик арыйыы  буолбута.  Конкурска 7 автор кыттыбытыттан (8 хоһоон) баһылык Р.Р.Романов председателлээх дьүүллүр сүбэ талбыт хоһоонун нэһилиэк Сэбиэтин депуттара бигэргэппиттэрэ, поэт Гаврил Андросов тылларын  Баайаҕа Гимнинэн ылыммыттара. Ааспыт  сыллар устата  Гимн мелодиятыгар икки төгүллээн  истии буолан баран бигэргэммэтэҕэ. Быйыл Өрөгөйбүт ырыатын тыла, мелодията дьүөрэлэһэн, ытыктыыр баһылыкпыт Роман Романович Романов саҕалаабыт биир суолталаах үлэтэ олоххо киирдэ.

Нэһилиэк депутаттарын истиилэригэр Өрөгөй ырыатын СР култууратын үтүөлээх үлэһитэ Марита Никитична Потапова куоракка олорор ырыаһыт  биир дойдулаахтарбытын түмэн, куоласка арааран акапельно  ыллатан аудио устан бэлэмнээтэ, комиссияҕа киирэн сөптөөх быһаарыныыны ылынарга төһүү күүс буолла.

Бу дьыл кулун тутарга ыытыллар биир дойдулаахтар үгэс буолбут түмсүүлэригэр Баайаҕа Гимнин сүрэхтэниитэ буолуоҕа.

Баайаҕа Өрөгөй ырыата

Гаврил Андросов тыллара                    Станислав Луковцев мелодията

Омоҕой өбүгэ саҕаттан

Олохтоох удьуордар буоламмыт,

Баайаҕа үрэҕин аатырдан

Барҕарар суоллары тыырдахпыт.

Хос ырыата:

Кыайыыны уһаарар Баайаҕам,

Байаҕантай кыыма күн Тааттам

Чиҥ саха биһигэ буолуоҕа,

Аар саарга сыдьаайа туруоҕа!

Дэм дэлэй Дэлгэһэ дойдутун

Балтатын, хотуурун уйгута,

Баатыр, уус, сэһэнньит идэтэ

Үйэттэн үйэҕэ үрдээтин.

Үрэхпит быстыбат сүүрүгэ,

Бар дьоммут сомоҕо түмсүүтэ

“Барыбыт-Баайаҕа туһугар!”

Кэскилгэ дьулууру сирдээтин.