“Байаҕантай” информационнай киин билиһиннэрэр

Планерка сонуннара

Олунньу 24 күнэ, бэнидиэнньик

— “Мандар Уус” Айылгы, Айымньы киинин салайааччыта  П.П.Бурнашова олунньу 22 күнүгэр ыытыллыбыт Саха сирин тимир уустарын “Дархан Уус” XIV быыстапкатын туһунан иһитиннэрии оҥордо.

Кини кэпсииринэн, ытык киһибит Б.Ф.Неустроев – Мандар Уус төрөөбүтэ 80 сылын көрсө ыытыллыбыт саха тимир уустарын сүрүн түһүлгэтигэр быйыл  хаһааҥҥытааҕар да элбэх уус, 80-тан тахса тимири эллээччи,  кыттыыны ылла.  Сылын ахсын “Куруһаала” уораҕайыгар ыытыллар улахан тэрээһини биир дойдулаахтарбыт Гаврил Андросов, Ньургун Бэчигэн тэрийсэн ыыталлар, дьүүллүүр сүбэҕэ норуот маастара Сарыал Билюкин үлэлиир. Баайаҕаттан 17 уус кыттыыны ылла. “Бастыҥ уус-уран оҥоһуулаах быһах” бөлөххө 3 миэстэни Феликс Шамаев (9 кыттааччы), “Бастыҥ ас быһаҕа” — 1 миэстэни  Степан Пахомов, 2 миэстэни  Гаврил Мохначевскай (70 кыттааччы)  ыланнар дойдуларын аатын ааттаттылар. “Дэгиттэр быһах” бөлөххө 4 миэстэни ылан Гаврил Мохначевскай биэс бастыҥ уус иһигэр киирдэ. (66 кыттааччы). Эдэр уус  Феликс Шамаев “Таатта улууһун маастара” үрдүк ааты ылла.

“Мандар Уус” киин, этнологическай музей үлэһиттэрэ Мандар Уус оҥоһуктарын, кинигэлэрин быыстапкатын тэрийдилэр, элбэх киһи сэҥээрэн көрдө, пресса интервью ылла. Быыстапка аһыллыытыгар “Баайаҕа-уус дьон биһигэ” ырыаны Дьокуускайга олорор ырыаһыт биир дойдулаахтарбыт ньиргиччи ыллаатылар. (Бэлиэтээн эттэххэ,  Уйбаан Бахсылыырап тылыгар суруллубут ырыа матыыбын ааптара биир дойдулаахпыт Станислав Луковцев буолар – бэйэбит инф.) “Дархан Уус” быыстапка үрдүк таһымҥа ааста, атыы-тутуу үчүгэйдик барда. Мандар Ууска уһуйуллан  үгүс ыччаппыт Дьокуускайга  уһанар кыһа тэринэн үлэлии-хамсыы олороллоро үөрдэр.

Парасковья Петровна Мандар Уус үбүлүөйдээх сылын бастакы эппиэттээх тэрээһинигэр  кыттан кэлбит Баайаҕа делегациятын аатыттан нэһилиэк баһылыга А.Р.Романовка дириҥ махталын тиэртэ.

-Олунньу 22 күнүгэр  Аҕа дойдуну көмүскээччилэр күннэринэн биэчэр ыытылынна. Дойдубутугар анал байыаннай дьайыы бара турар кэмигэр бу күн өссө ордук суолталаах, биһиги нэһилиэктэн, биир дойдулаах буойун уолаттарбыт  Ийэ  дойду  иннигэр ытык иэстэрин чиэстээхтик толороллор.

 Бу киэһэ нэһилиэк кэрэ аҥардара Аҕа дойдуну көмүскээччилэргэ  анаан эҕэрдэ кэнсиэр көрдөрдүлэр, оонньуу тэрийдилэр, биэчэргэ кэлбит хас биирдии эр киһиэхэ анал бириис бэлэхтээтилэр.

-Мантан саас Улуу  Кыайыы 80 сылыгар аналлаах улуустааҕы көрүү-фестивальга бэлэм саҕаланар. Баайаҕа нэһилиэгэр көрүү-фестиваль кулун тутар 18 күнүгэр буолар. Улуу Кыайыы суолтата үйэлэргэ өлбөөдүйбэтин туһугар ыытыллар биир улахан өйдөбүллээх тэрээһиҥҥэ нэһилиэк дьоно көхтөөхтүк кытталлара ирдэнэр.