Роман Романович Романов кэриэһигэр  бильярдка аһаҕас турнир

Таатта улууһун Баайаҕа нэһилиэгин Аҕа баһылыгынан 20 сыл устата дьоһуннук үлэлээбит тумус туттар ытыктыыр салайааччыбыт, патриот, чулуу спортсмен,  СР муниципальнай сулууспатын туйгуна, СР спордун маастара, «СР олохтоох бэйэни салайыныы сайдыытыгар кылаатын иһин», И.И.Крафт аатынан СР Президенин «Попечитель уонна меценат» бэлиэлэр, «ХХ үйэ чулуу мадьыныта» аат хаһаайыннара Романов Роман Романович  кэриэһигэр олунньу 15-16 күннэригэр бильярдка аһаҕас турнир үрдүк таһымнаахтык ыытылынна.

Роман Романович баһылыгынан үлэлиир кэмигэр дьонун-сэргэтин биир сомоҕо санаалаан, төрөөбүт нэһилиэгин инники сайдыытын киэҥник көрөн утумнаах үгүс үлэни ыыппыта, бар дьоно бигэ туруктаах, байылыат  олохтоох буолуутугар  сүрүн болҕомтотун уурбута, бары таһымҥа дьаныардаахтык туруулаһан, туруоруммут сыалын ситиһэн, Баайаҕа нэһилиэгин социальнай-экономическай, култуурунай-духуобунай сайдыытын түстээбитэ, дириҥ, баай устуоруйалаах тапталлаах дойдута  Саха сирин  биир  бэлиэ сирэ буоларыгар олук уурбута. Чөл олоҕу, спорду өрө тутан, эр дьон түмсэр, дьарыктанар усулуобуйаларын тэрийиигэ, нэһилиэкпитигэр бильярд спорда сайдарыгар үгүс үлэни ыыппыта.

Турнирга Таатта улууһун нэһилиэктэриттэн — Чымынаайыттан, Чөркөөхтөн, Туора-Күөлтэн, Ытык-Күөлтэн, Уус-Тааттаттан, Дэбдиргэттэн, Дьохсоҕонтон, Баайаҕаттан уонна Чурапчыттан барыта  51 бильярдист кыттыыны ылла: 18-50 саастаахтарга 18 кыттааччы, 50 үөһэ саастаахтарга 33 спортсмен кыттыннылар.

2 күннээх тыҥааһыннаах күрэхтэһии түмүгүнэн эдэр оонньооччулар бөлөхтөрүгэр 1 миэстэни Баайаҕа ыччата Луковцев Станислав ылан Таатта нэһилиэктэрин баһылыктара спонсордаабыт телевизор бирииһинэн наҕараадаланна. 2 миэстэни Егоров Айаал (Чурапчы) ылла, Баайаҕа бильярдистара туруорбут ларь хаһаайына буолла. 3 миэстэни Оконешников Афанасий (Ытык-Күөл) ситистэ,  Роман Романович оскуолаҕа бииргэ үөрэммит доҕотторо спонсордаабыт “Учур” маҕаһыын сертификатынан наҕараадаланна. Маны таһынан 6 иһигэр киирбит оонньооччулар бары сыаналаах бириистэри туттулар, спонсордар – Яроев Валерий Васильевич, Андросов Иннокентий Михайлович, Старостин Степан Петрович.

50 үөһэ саастаахтар бөлөхтөрүгэр 1 миэстэни Барашков Степан Степанович (Чурапчы) ситиһэн, Роман Романович дьиэ кэргэнэ, оҕолоро туруорбут убаһа бирииһинэн наҕараадаланна. 2 миэстэни Луковцев Петр Петрович (Туора-Күөл) ылла, Баайаҕа бильярдистарын ларь бириистэрин тутта. 3 миэстэни Саввин Иван Иванович (Чымнаайы) ылла, однокурсниктар уонна АЗС коллектива спонсордаабыт харчынан бирииһинэн наҕараадаланна. Маны таһынан 8 иһигэр киирбиттэр бары сыаналаах бириистэр хаһаайыннарынан буоллулар. Спонсордар – Неустроев Петр Борисович, Таатта улууһун спорткомитета, Баайаҕа нэһилиэгин дьаһалтата.

Баайаҕа нэһилиэгэр бильярд спордун көҕүлээччи, күрэхтэһии сүрүн тэрийээччитэ Андросов Анатолий Герасимович Роман Романович аҕатын, бииргэ төрөөбүттэрин уонна аймахтарын аатыттан кий бирииһинэн наҕараадаланна. Бильярд кулуубун эппиэтинэстээхтик көрөр-истэр Неустроев Константин Ивановичка СР бильярд спордун  федерациятын  вице-президенэ Лазарев Иван Васильевич спонсордаабыт кий бирииһэ туттарылынна.

Күрэхтэһии түмүгүнэн анал ааттар олохтоннулар: “Бильярд спордун көҕүлээччи Аҕа баһылык” анал ааты Уус-Амма нэһилиэгин баһылыга Васильев Егор Владимирович ылла, Луковцев Николай Николаевич, Игнатьева Светлана Семеновна спонсордаабыт бириистэринэн наҕараадаланна. “Саамай эдэр оонньооччу” – Никифоров Иннокентий (Дэбдиргэ) орто оскуола бирииһин, “Саамай саастаах оонньооччу” Иванов Семен Семенович (Баайаҕа) “Баай-маркет” анал бирииһин ыллылар. Күрэхтэһиигэ көхтөөх кыттыыны ылбыт Пудов (Чурапчы), Яковлева Октябрина (Ытык-Күөл) Христофоров Владимир Владимирович бириистэрин туттулар. Евлев Николай (Чымнаайы) “Мандар Уус” Айылгы, Айымньы киинин бирииһин, Васильев Афанасий (Баайаҕа) ветучасток бирииһин, Попов Пантелеймон (Баайаҕа) “Аллан” маҕаһыын бирииһин, Попова Клавдия (Баайаҕа) уонна Васильева Марфа (Чымнаайы)  “Баай-маркет” бириистэрин, Керегяев Гаврил (Чөркөөх) “Мандар Уус” кэлим түмэлин бирииһин, Романов Роберт (Мэҥэ-Хаҥалас, Суола) “Татьяна” маҕаһыын бирииһин ыллылар.

Эдэр оонньоччуларга 6 иһигэр, ветераннарга 8 иһигэр киирбэтэхтэргэ “Утешиловка” диэн күрэхтэһии иккис түһүмэҕэ салгыы оонньонно. Түмүккэ Слепцов Игнатий (Баайаҕа) 1 миэстэ буолан, Роман Романович бииргэ бултаабыт доҕотторун бириистэрин, 2 миэстэни ылбыт Неустроев Афанасий (Уус-Таатта) Григорьев Гаврил Гаврильевич бирииһин, 3 миэстэни ылбыт Васильев Афанасий (Баайаҕа) үөлээннээхтэрэ, табаарыстара туруорбут бириистэрин, 4 миэстэлээх Томскай Айхал (Чурапчы) “Баай-Ас” ТХПК бирииһин, 5 миэстэни ылбыт Луковцев Эльфидифор (Дэбдиргэ) “Тускун”, библиотека бириистэрин туттулар.  Көхтөөх кыттааччы Аянитов Гаврилга (Туора-Күөл) Христофоров Владимир Владимирович бирииһэ тигистэ.

Салгыы бириискэ тиксибэтэх 4 оонньооччуга “Буллит” ыытылынна, манна кыайыылааҕынан Филиппов Иван (Дьохсоҕон) буолан, Слепцов Игнатий Иннокентьевич олохтообут бирииһинэн наҕараадаланна.

Өлбөөдүйбэт үтүөлээх баһылыкпыт Романов Роман Романович сырдык аатыгар ыытыллыбыт күрэхтэһиини тэрийбит спорт энтузиаһыгар Андросов Анатолий Герасимовичка, 435000 солк. уопсай сууммалаах сыаналаах бириистэри олохтоон күүс-көмө буолбут бары спонсордарбытыгар, Таатта улууһун нэһилиэгин баһылыктарыгар, СР бильярд спордун федерациятыгар, улуус спордун комитетыгар, бары тэрилтэлэр, маҕаһыыннар салайааччыларыгар, Роман Романовичпыт  бары чугас, доҕор-атас дьонугар, аймахтарыгар, “Мандар Уус” кэлим түмэлигэр босхо экскурсияны тэрийбит Егоров Николай Ивановичка, аһылыгы тэрийбит Апросимова Екатерина Николаевнаҕа уонна бары күүс-көмө буолбут бар дьоммутугар дириҥ махталбытын тиэрдэбит!

 Ытыктыыр салайааччыбыт дойдутун, бар дьонун туһугар олорбут олоҕо,  киэҥ далааһыннаах үлэтэ, оҥорбут үтүөтэ, кини сырдык мөссүөнэ  хаһан да умнуллуо суоҕа, үтүө аата куруутун ааттана туруоҕа.

                               “Баайаҕа нэһилиэгэ” МТ дьаһалтата

Олунньу, 2025 сыл