“Байаҕантай” информационнай киин

 билиһиннэрэр

Олунньу 17 күнэ, бэнидиэнньик

-Нэһилиэк тыатын хаһаайыстыбатын специалиһа Аркадий Хатылаев иһитиннэриитинэн, Ытык Күөлгэ А.И. Еремеев салайааччылаах Ил Түмэн делегациятын кытта көрсүһүү буолла. Кэпсэтии тыа хаһаайыстыбатыгар улууска бэриллибит полномочие тула буолла, көрүллэр харчыны тыырыыга  үөскүүр  ыйытыылары  ырытыы барда. Сотору кэминэн Правительство  445 №-дээх Уурааҕа тахсан олоххо киириитигэр сөптөөх быһаарыныыны ылынарга  киэҥ кэпсэтии таҕыста.

 Онон нэһилиэкпит үүт туттарар хаһаайыстыбалара, сүөһү төбөтүгэр ылааччылар бары электроннай бюджекка көһөн, ЭЦП (электронная цифровая подпись) оҥоттороллоро ирдэнэр. Салалта манна үлэлии олорор.

-Олунньу 11 күнүгэр Бэтэрээн Сэбиэтэ, нэһилиэк ветучаастагын тэрийиилэринэн “Музей в чемодане” бырайыагынан тыыл бэтэрээннэрэ кэргэннии Е.Н.Христофороваҕа, Н.П.Макаровка аналлаах “Кинилэр Кыайыыны уһансыбыттара” быыстапка үрдүк таһымҥа ыытылынна, сиһилии библиотека Телеграм каналыгар сурулунна.

-Олунньу 14 күнүгэр  Төрөөбүт тыл уонна сурук-бичик күнүгэр аналлаах “Сахалыы дьыктаан”, “Тыл оонньуута”  ыытылынна. Дьыктааны библиотекаҕа  кэлэн 14 киһи суруйда, 3 хамаанда оонньууга кытынна. Маны тэҥэ оскуолаҕа, «Мандар Уус» этнологическай музейга араас хабааннаах  тэрээһиннэр ыытылыннылар.

— Олунньу 15-16 күннэригэр ытыктыыр баһылыкпыт, нэһилиэккэ бильярд спорда сайдарыгар үтүөлээх Р.Р.Романов кэриэһигэр улуустааҕы бильярд күрэһэр 53 киһи кытынна, күрэхтэһии үрдүк таһымҥа ааста, бу туһунан иһитиннэрии  сиһилии суруллуо.

— Түөлбэлэринэн ППМИ харчытын хомуйуу саҕаланна.