Загрузка...Баайаҕаҕа Улуу Кыайыы сылын арыйыы
“ Түөрт уон биир сыллаахтар бааргыт дуо,
Төрүт буор, сир-дойду ахтар дуо?”,
-диэн учууталбыт Владимир Семенович үйэлээх ыйытыктарынан баайаҕалар үүммүт 2025 сылы арыйдыбыт.
Аҕа дойдуну көмүскээччилэр сылларын арыйыыга нэһилиэк баһылыга Александр Романов саҥа булуллубут чахчылары иһитиннэрдэ:
“Быйыл дойдубут Улуу Кыайыы 80 сылын бэлиэтиир. Аҕа дойду Улуу сэриитигэр Баайаҕа нэһилиэгиттэн 148 киһи кыттыбыта диэн буолара. Күн бүгүн биир дойдулаахтарбыт, кыраайы үөрэтээччилэр Татьяна Игнатьевна, Гаврил Гаврильевич хомуйа сылдьар матырыйаалларыгар олоҕурдахха:
Баайаҕаттан барыта : 170 киһи сэриигэ ыҥырыллыбыт.
Өлбүтэ: 50
Сураҕа суох сүппүтэ: 17
Эргиллибитэ: 92
Биллибэтэ: 11
Аҕа дойду Улуу сэриитин кыттыылаахтарыттан 5 буойун Кыһыл Сулус, 6 буойун — Албан Аат, 24 буойун Аҕа дойду сэриитин I, II степеннээх орденнарынан, 7 буойун “Хорсунун иһин”, 7 буойун “Бойобуой үтүөлэрин иһин” мэтээллэринэн наҕараадаламмыттара.”
Бу күн сэрии ыар тыынын эттэринэн-хааннарынан билбит сэрии тулаайахтара: СР норуотун хаһаайыстыбатын үтүөлээх үлэһитэ С.С.Иванов, РСФСР үөрэҕириитин туйгуна И.Н.Скрябина; бэтэрээн Сэбиэтин бэрэссэдээтэлэ М.Р.Егорова Улуу Кыайыы күнэ үйэлэргэ өлбөөйдүйбэтин туһугар туһаайан оҕолорго суолталаах тыллары эттилэр, харда тылы оскуола бастыҥнара Егор Винокуров, Уруйдаана Андросова тиэртилэр. Оскуолаҕа оҕону иитиигэ дириэктэр сүбэһитэ З.Р.Луковцева ирдэбил үлэлэри ыытар сорудахтары кылаас старосталарыгар туттарда. Нэһилиэк тэрилтэлэрэ Кыайыы сылын эҕэрдэ нүөмэрдэринэн уруйдаатылар, сахаҕа Кыайыы Гимнэ буолбут “Хайыһар” ырыаны мустубут дьон бары бииргэ дуорааннахтык ыллаата.
Баайаҕа айар талааннаахтарын хоһоонноруттан турар дьүһүйүүнэн саҕаламмыт Улуу Кыайыы сылын арыйыы тэрээһиннээхтик, өрө көтөҕүллүүлээхтик үрдүк таһымҥа ааста.
Хаанынан ытаабыт дьылларгыт,
Аччыктаан сордоммут сылларгыт
Аҕаалтар эбит дии, кыайыыны,
Аныгы дьоннору абырыы.
Адьаһын бүппэтин абарыы-
Андаҕар дуорайдын сатарыы!
Владимир Андросов
Олунньу 1 күнэ, 2025 сыл.
