Ахсынньы 24 күнүгэр  Национальнай библиотека Историческай саалатыгар биир дойдулаахпыт,  сээркээн сэһэнньит, сир түннүгэ Егор Дмитриевич Андросов төрөөбүтэ 100 сылыгар анаммыт “Сир түннүгэ киһи. Дьөгүөр Ондуруоһап феномена” өрөспүүбүлүкэтээҕи төгүрүк остуол ыытылынна.

Төгүрүк остуолу  Саха сирин суруйааччыларын Сойууһун бэрэссэдээтэлэ Гаврил Андросов  салайан ыытта. Кини киирии тылыгар Е.Д.Андросов  нэһилиэстибэтин, личноһын өссө төгүл ырытан, ыараҥнатан, сыаналаан, үйэтитии туһунан аһаҕас кэпсэтиигэ ыҥырда. Төгүрүк остуолга үгүс киһи сырытта, санаатын эттэ, бу кэпсэтии түмүгүнэн  торум оҥоһуллан үлэ ыытыллыа диэн Г.Г. Андросов уһун, хорутуулаах мунньаҕы түмүктээтэ.

Киэҥ кэпсэтииттэн саха народнай суруйааччыта Николай Лугинов Е.Д.Андросов туһунан этиитин билиһиннэрэбит:

• Мин Егор Дмитриевиһы кытта анаан-минээн Таатта Ытык сирдэрин кэрийбитим. Кини миэхэ наһаа үчүгэйдик аһыллан, кэпсэппиппит, барытын сурунан ылбытым. Егор Дмитриевич краевед диэнтэн таһыччы үрдүк турар уһулуччулаах үөрэхтээх бөлүһүөк, интеллектуал, саха норуотугар аҕыйахта  көстөр сэдэх киһи этэ. Биһиги сөбүлэһэр да,  сөбүлэспэт да түгэммит  баара. “Ньукулай, мин эйиэхэ ураты сирдэри көрдөрүөм, убайдарыҥ Ойуунускайдаах сылдьыбыт, ким да билбэт сирдэрин,  аны сайын кэлээр”, -диэн кини миигин өссө ыҥырбыта.  Мин кыайан тахсыбатаҕым. Арааһа, ол киһи арыллар,  киһиэхэ ураты санааны саҕар сирдэр эбитэ буолуо. Кини көнө сүрүннээх, уот харахха кыларыйан турар кырдьыгы этэр киһи этэ. Мин кини аатыгар сүгүрүйэ махтанабын, миигин ылынан мээнэ этиллибэти эппитигэр,  сокровеннай сирдэри көрдөрүөх буолбута   бу — миэхэ Итэҕэл. Егор Дмитриевич нэһилиэстибэтин иҥэн-тоҥон үөрэтиҥ, олохпор көрсүбүт дьоммуттан маннык киһини өтөрүнэн билбэтэҕим.