1 Звезда2 Звезды3 Звезды4 Звезды5 Звезд (2 оценок, среднее: 3,00 из 5)
Загрузка...
140 просмотров

Баайаҕаҕа “Томтор” киинэ саалатын арыллыыта

Бу дьыл  алтынньы 4 күнүгэр, Р.Р. Романов аатынан Баайаҕа култуурунай-спортивнай комплексыгар  киинэ көрөр  саала аһыллан, биир умнуллубат  бэлиэ күн ааспыта. Баайаҕа олохтоохторо  Республика Ил Дархана Айсен Николаев кыттыылаах  Сахабыт сирин араас муннуктарыгар 40 киинэ саалатын куйаар ситимин нөҥүө арыйыы  түгэнигэр кыттыспыппыт, Баайаҕаҕа “Томтор” киинэ саалатын үөрүүлээх быһыыга-майгыга арыйбыппыт.

Ил Дархан республикаҕа киин сиртэн ыраах сытар нэһилиэнньэлээх пууннарга киинэ саалалара кэлимник тэриллиилэрэ “Экстра Синема”- хааччахтаммыт эппиэтинэстээх тэрилтэ ангыгы технологиялары баһылаабыт бырайыагынан,  дойду Президенэ П.Путин  өйөбүлүнэн  олоххо киирэллэрин  тоһоҕолоон бэлиэтээтэ.

 “Томтор” киинэ саалатын үөрүүлээх-быһыыга майгыга арыйыы аалай кыһыл лиэнтэтин “Баайаҕа нэһилиэгэ” МТ баһылыгын солбуйааччы А.А.Николаева, “Гражданскай килбиэн”, “Үтүө дьыала”бэлиэлэр хаһаайыннара, үлэ бэтэрээнэ, киномеханик  Г.С. Андросов, “Тускун” култуура киинин директора Д.Д. Апросимов быстылар. Киинэ бэтэрээнэ Гаврил Софронович  оччотооҕу кэмҥэ киинэ көрдөрүү уратытын, киинэни тиэйэн аҕалыы, “кассовай”, “индиискэй” киинэлэри  кинемаханиктар улахан сыранан, сырсыынан ылан көрдөрөллөрүн, бииргэ үлэлээбит коллегата, СР киинэтин Бочуоттаах бэтэрээнэ,  Россия кинематографиятын туйгуна М.М.Луковцева-Киинэ Маайата бүгүҥҥү үөрүүлээх күнүнэн көрөөччүлэригэр эҕэрдэ ыытарын эттэ. “Тускун” киин директора Д.Д.Апросимов киинэ саалатын арыйыыга ыыппыт үлэтин сиһилии кэпсээтэ, олоххо киириитигэр көмөлөспүт дьоҥҥо махтанна. Кырдьыга да,  киинэ саалата  Тааттаҕа биир бастакынан  Баайаҕаҕа киириитэ  эдэр салайааччы  кыһамньылаах үлэтин  үтүө түмүгэ буолар.

А.А.Николаева киинэ көрүү култуурата норуокка эргийбитинэн эҕэрдэлээн туран,  дьаһалта аатыттан киинэ бэтэрээннэригэр М.М.Луковцеваҕа, Г.С.Андросовка,  бүгүҥҥү күҥҥэ саха киинэтэ сайдыытыгар кылааттарын киллэрэр, дойдуларын аатын ааттатар биллиилээх киинэ артыыстарыгар Иннокентий Луковцевка, Ньургун Бэчигэҥҥэ, Правительство отчуотугар нэһилиэктэргэ киинэ көрдөрүүнү туруорсан Баайаҕаҕа киинэ саалата арыллыытыгар олук уурсубут педагогическай үлэ бэтэрээнэ П.Н.Кустуроваҕа, “Тускун” култуура киинин директора Д.Д.  Апросимовка Махтал Суруктары туттарда.

Кылгастык аҕыннахха, Саха сиригэр  киинэни көрдөрүү ааспыт үйэ бастакы аҥарыгар кэлбитэ. Киинэ сэбиэскэй былаас хараҥа норуоту сырдатыытыгар, бары өттүнэн  сайыннарыытыгар, саҥа кэм дьонун иитэн-үөрэтэн  таһаарыытыгар, ыччаты патриотическай иитиигэ  улахан оруолу ылбыта. Дойдуга дьон улахан саалаларга лыык курдук мустан, күүстээх үлэ кэннэ киинэ көрөн дуоһуйа сынньанар, үтүө үгэһэ олохсуйбута. Биһиги нэһилиэккэ киинэ искусствотын норуокка тиэрдэр тэрилтэ киномеханиктарынан Андросов Василий Семенович, Христофоров Иннокентий Дмитриевич, Христофоров Дмитрий Дмитриевич, Луковцева Мария Михайловна, Гаврил Софронович Андросов, Луковцев Афанасий Афанасьевич  уо.д.а. үлэлээбиттэрэ.

1992 сыллаахха саха бастакы Президенэ Михаил Ефимович Николаев уурааҕынан “Сахафильм” национальнай киинэ хампаанньата төрүттэммитэ, саха норуота аан дойду сайдыытын өссө биир үрдэлин баһылыырыгар кыах үөскээбитэ. Күн бүгүн саха киинэтэ эрэллээхтик инники хардыылыыр, “саха киинэтин феномена” аар саарга аатырар.

XXI үйэҕэ биһиги биир дойдулаахтарбыт, баайаҕалар,  саха киинэтин сайдыытыгар дьоһун кылааты киллэрэллэр, кинилэри  киэн тутта ааттыыбыт:

Иннокентий Луковцев – биллиилээх  театр  уонна киинэ артыыһа, продюсер. Россия Государственнай бириэмийэтин лауреата, Саха Республикатын үтүөлээх артыыһа.

 “Кэрэл”, “Айта” киинэлэргэ оонньоон икки төгүл Россия фестивалларыгар “Бастыҥ эр киһи оруола”  — лауреат аатын ылбыта.

Иннокентий Луковцев фильмографията:

2024 – Триумф (Дмитрий Коркин — сүрүн оруол)

2023 – Лоокуут уонна Ньургуһун

2022-Дьулуур:мас-рестлинг ( Эллэй-сүрүн оруол)

2022- Айта

2021 –Ыт

2021 – Нуучча

2020 — Тиэтэйбит

2019 – Мин үрдүбэр күн хаһан да киирбэт (аҕа оруола)

2017 – Чувак (Уол оҕото)

2017 – Кэрэл

2016 – Ыаллылар

2012 — Дойду

2011 – Однажды (Арай биирдэ)

2009 – Тайна Чингиз Хаана (Монголия, Россия)

2007 – Причуды дождя (короткометражный)

Ньургун Бэчигэн

Киинэҕэ 2017 сылтан дебюттаабыта. 2020 сыллаахха “Тыгын Дархан” киинэҕэ сүрүн оруолу чаҕылхайдык толорбута. Бу оруолунан Улуу Новгородка ыытыллыбыт “Вече” фестивальга, “Волоколамский рубеж” норуоттар икки ардыларынааҕы фестивальга “Бастыҥ эр киһи оруола” ааттары ылбыта.

2024 сыллаахха “Кыталыктаах кырдалым” киинэҕэ аҕа оруолун иһин “Восток-Запад. Классика и авангард” норуоттар икки ардыларынааҕа киинэ фестивалыгар Россия киинэтигэр “Бастыҥ актер” үрдүк ааты ылан “Золотой сарматский лев” бирииһинэн  наҕараадаламмыта.

Фильмография:

2024 – Кыталыктаах кырдалым (аҕа оруола)

2023 – Чужая

2020 – Тыгын Дархан ( Тыгын Дархан -сүрүн оруол)

«Томтор» киинэ саалата көрдөрбүт бастакы киинэтинэн биир дойдулаахпыт Ньургун Бэчигэн оонньуур «Кыталыктаах кырдалым» хартыыната буолбута өссө биһирэмнээх  уонна  үөрүүлээх.

   

Добавить комментарий

Ваш адрес email не будет опубликован. Обязательные поля помечены *