Библионочь — 2023 

            Ыам ыйын 29 күнүгэр Учуутал уонна наставник сылыгар нэһилиэкпитигэр «Библионочь -2023” бүтүн Россиятааҕы акция  буолан ааста. Библионочь  ыытыллыытыгар бэтэрээн Сэбиэтэ, “Далбар” дьахталлар түмсүүлэрэ көмөлөстүлэр.  Бу күн  араас тэрээһин буолла.

 Баайаҕа эмтиир  учаастагын  бырааһа Татьяна Гаврильевна Уранаева атеросклероз  ыарыытын сэрэтии туһунан иһитинэриини оҥордо, сөптөөхтүк аһаан доруобуйаны көрүнүүнү олус интириэһинэйдик  кэпсээтэ, мустубут дьон доруобуйатын көрдө, киниттэн  дьон туһааннаах сүбэлэри ылан астынна, махтанна.

   
 “Бииргэ ааҕабыт” акциянан библиотекаҕа ааҕааччынан туруу, кинигэ уларсыы тэрилиннэ.

РСФСР норуотун үөрэҕириитин туйгуна, Андросовтар учуутал династияларын ытык киһитэ, саха тылын уонна литературатын учуутала   Поликарп Александрович Андросов төрөөбүтэ 90 сылыгар Уус-уран ааҕыы конкурса народнай поэт Семен Данилов поэзиятынан “Киһиэхэ төрөөбүт дойдута” диэн уус-уран дьүһүйүү быһыытынан  үс көлүөнэнэн  ыытылынна.  Уус-уран дьүһүйүүгэ Семен Данилов аан дойдуну тилийэ көппүт “Саха үҥкүүтэ” ырыа буолбут  хоһоонунан үҥкүү, норуот уостан түһэрбэт ырыалара ылланнылар.

Дьүүллүүр сүбэҕэ Поликарп Александрович утумнааччылара, наставник-учууталлар – РСФСР үөрэҕириитин туйгуна, Таатта улууһун, Баайаҕа нэһилиэгин Бочуоттаах олохтооҕо, Россия журналистарын Сойууһун чилиэнэ, краевед М.Р.Егорова,  РФ уопсай үөрэхтээһинин бочуоттаах үлэһитэ, СР культуратын туйгуна, Баайаҕа нэһилиэгин Бочуоттаах олохтооҕо,  литературнай критик О.Н.Макарова уонна  “Тускун” сынньалаҥ киин уус-уран салайааччыта А.В.Андреев үлэлээтилэр. Түмүккэ улахан дьоҥҥо: 1 миэстэ — Конон Мандаров, 2 миэстэ Дмитрий Апросимов, 3 миэстэ – Арина Харова, “Чуор куоластаах ааҕааччы” номинация- Ада Кларова.

Ыччакка: 1 миэстэ- Никодим Христофоров, 2 миэстэ Витя Хатылаев, 3 миэстэ-Данил Иванов.

Кырачаан кыттааччылар Егор Харов” Кэскиллээх ааҕааччы”, Рудик Апросимов “Истиҥ ааҕааччы” номинациялары туттулар 

 Учуутал Анна Яковлевна Иванова саҥа сатабылларга —  графическай редактор GorelDRAW программаҕа грамота, буклет оҥорорго, телефоҥҥа VN редакторынан видео таҥарга үөрэттэ.

Бу күннэргэ томороон тымныыттан этэҥҥэ күөххэ үктэнэн, барыбытыгар таһырдьа үлэ-хамнас үгэннээн турдаҕына,  эр дьоммут айылҕа абылаҥыттан быыс булан — конкурска кыттыбыт бары хоһоонньуттарбытыгар, дьоҥҥо билиилэринэн туһа буолбут кыттааччыларбытыгар, кэлэн көрбүт-истибит  дьоммутугар-сэргэбитигэр тэрийээччилэр ааттарыттан барҕа махталбытын тиэрдэбит!