1 Звезда2 Звезды3 Звезды4 Звезды5 Звезд (2 оценок, среднее: 5,00 из 5)
Загрузка...
450 просмотров

Ыам ыйын 9 күнэ-Улуу Кыайыы күнэ

 

Буойун, учуутал Василий Захарович Мандаров

Улуу Кыайыы күнүгэр  Аҕа дойду Улуу сэриитигэр саа-саадах тутан Ийэ дойдутун көмүскэспит буойун-учуутал,  педагогическай үлэ, сэрии, тыыл, партия бэтэрээнэ Мандаров Василий Захарович хоһооннорун билиһиннэрэбит.

Саха тылын уонна литературатын учуутала, Мандаровтар учуутал утумнарын саҕалаабыт Василий Захарович Мандаров,    оскуолаҕа сэрии сылларыгар төрүттэммит  “Айар дьоҕур” диэн илиинэн суруллар литературнай сурунаалы айымньылаахтык үлэлэппитэ,  республикаҕа биһирэммитэ. “Байыас доҕорбор” диэн учуутал доҕоругар С.К.Андросовка анаабыт хоһооно фронтовик Г.А.Неустроев мелодиятыгар дьон сөбүлүүр ырыата буолан киэҥник тарҕаммыта.

В.З.Мандаров оҕо иитиитигэр 43 сыл үлэлээбит наставник-учуутал, лектор, пропагандист, партийнай үлэһит, кыраайы үөрэтээччи, общественник. Кини республика хаһыатын, радиотын корреспондена буолан,  сэрии, тыыл бэтэрээннэрин, биэс бырааттыы Малгиннары үйэтитиигэ үгүс сыратын биэрбитэ, музейдарга көмөлөспүтэ.

Байыас доҕорбор

                                          С.К.Андросовка

Буурҕалаах Дальнай Востокка

Модун күүс бойобуой походка,

Эрэллээх байыастар буолабыт,

Эйэлээх олоҕу айабыт.

 

Харса суох, хорсун күүс, эр санаа

Өлүүттэн өргөстөн чугуппат.

Төрөппүт народпут айхаллаа,

Байыаскын бүөмчү күүс чаҕыппат.

 

Өстөөхтөр үспүйүөн ыыталлар,

Өстүйэн дойдубун тыыталлар,

Доҕоруом,сэргэхтик туруохха,

Толору бэлэми тутуохха.

 

Кытаанах воляны көрдөрөр,

Кыайыыга дойдуну аҕалар.

Эрэллээх байыастар буолабыт,

Эйэлээх олоҕу айабыт.

 

Төрөөбүт дойдубут иннигэр

Олоххо, народка иэс төлөөн,

Тиийиэхпит үөскээбит алааскаа,

Киириэхпит үөрэппит кылааска.

 

Буурҕалаах Дальнай Востокка

Модун күүс бойобуой походка,

Эрэллээх байыастар буолабыт,

Эйэлээх олоҕу айабыт.

74120-Ц хонуу почтата, 1945 с.

 

Ахтыы

(фроҥҥа сылдьан)

Күөх унаар тайҕаҕа,

Күндү көр далбарга

Күөрэгэй ырыата

Көрүлүү туойдаҕа…

Унаар күөх кыраайга,

Уу-чуумпу тунаарга

Көмүһүм-лоҕорум

Көһүтэн турдаҕа…

Ахтан өр күүттэҕэ

Арамаан убайым.

Балыктаан тиийдэҕэ

Вася уол быраатым.

(Көҕөнү ытаары

Көҥүскэ киирдэҕэ,

Ол ону ылаары

Афоня сүүрдэҕэ).

Үөрэммит, үөрэппит,

Үгүһү өйдөппүт

Оскуолам, кылааһым

Ыччатын мустаҕа…

Былаанын толорбут ,

Быйаҥын хомуйбут

Колхозтаах Баайаҕам

Дохуода байдаҕа…

Дойдубун көмүскүү-

Олохпор иэс төлүү

Силлиэни тыырабын,

Сэриигэ сылдьабын.

Кыргыһыы уурайан,

Кырдьыгы булунан

Кыраайбар тиийиэҕим,

Кылааспар киириэҕим.

п/п 74120-ц, 1945 с. 5.IX

 

А.Е.Кулаковскайга

Сата тыл аргыстаах анысхан буурҕаттан

Өлөксөй ырыата дьэ эбии уоҕурда.

Сүрэҕи көбүтэр күлүмнэс ылааттан

Сүүрүктүү угуттуур сүрэҕи тууһурта.

 

Эн ырыаҥ ырата ырааҕы көрбүтэ,

Илбистээх тылларыҥ өлөрү кыайбыта.

Ол иһин Эн ырыаҥ өлбөккө тыыннанна.

Ырыаһыт өлбүтэ, ырыата ылланна.

 

Имэҥнээх , илбистээх айар тыл маастара

Бу сиргэ, Тааттаҕа, куруутун үөскүүрэ.

Кэрэ чуор ырыаһыт кэхтибэт талаана

Бу дойду буоругар өрүүтүн төрүүрэ.

 

Киҥкиниир киэҥ халлаан килбиэнин анныгар

Кэхтибэт ырыалаах Эн ырыаҥ ылланна.

Кэскили булуммут  бу Саха сиригэр

Кэрэ чуор куолаһыҥ сатарда, албанна.

 

Ыам ыйын 29 к. 1946 с.

 

 

Үҥкүү, ырыа иһийдэ,

Чуумпу буолла айылҕа.

Халлаан иилии бүрүйдэ

Түүҥҥү барыар хараҥа.

 

Бүгүн Антон Чеховтан

Аахтым” Хаалаах киһитин”

Мин түннүкпэр кэрийдэ

Түүҥҥү барыар хараҥа.

 

Чуумпу “сынньан” диэбиттии

Үлэбиттэн ууратта.

Билсэр кыыспын билбиттии

Миигин уураан кууратта.

1947 с. Баайаҕв.

 

Сааскы ырыа

Балысхан уулардаах байхаллыы

Бараммат быйаҥнаах саас буолла.

Байылыат колхозтаах ыаллардыы

Барҕа баай сибэкки барҕарда.

Барҕарда, баһааннык наҕарда,

Наҕарда, налыйда, наскыйда.

Үтүмэн көтөрдөр кэлэннэр,

Үтүөккэн ырыаны тартылар;

Күөрэгэй, кэҕэ кыыл түһэннэр

Дорҕоонноох тойуктар туоллулар.

Туоллулар, дуоланнык туойдулар,

Туойдулар, дьоллорун буллулар.

Эриэккэс эгэлгэ кэм кэлэн,

Этэҥҥэ эрэллик эргийэн,

Күн уота көрүлүү умайда,

Күөх торҕо муората долгуйда.

Долгуйда, дойдубун тупсарда,

Тупсарда, тунуйда, тунаарда.

1946 с.

 

 

 

 

 

Добавить комментарий

Ваш адрес email не будет опубликован. Обязательные поля помечены *