Галина Неустроева 

Саҥа дьылы оҕо сылдьан
Дьикти курдук күүтэрим,
Тохтор көмүс киэргэллээх
Ёлка маһы сөҕө көрөн.

Кумааҕыны кырыйан,
Тиэстэ килиэй оҥостон,
Уһун сыабы тиһэрбит
Сиэдэрэйэ олус этэ.

Хаһыат лииһигэр сууламмыт

Бадааракпыт күндүтүөн,

Маҕан баата бытыктаах
Моруос оҕонньор сонунуон.

Тостор тымныы баара диэн
Өйдөөбөппүн букатын,
Халыҥ хаардаах күөх тыаны
Илэ көрөр курдукпун.

Тоҥуу хаарга батыллыбыт
Харыйаны сэргиирбит,
Кырпай хаарбыт күлүмүн
Одуулуурбут, чахчы үөрэн.

Остуоруйа аптаах сирэ
Маннык буолуо дии санаан,
Чаҕылыҥнас чуумпуну

Иһиллээммит турарбыт.

Оҕо сааһым дьиктитин

Илдьэ сылдьар курдукпун,
Чуумпураммын үгүстүк
Ыалдьыттыыбын ол кэмҥэ.

                        ***

 Барҕа санаа бастыҥын
Саҥа дьылга аныыбыт-
Аймах-билэ дьоннорго
Оҕолорго, сиэттэргэ.

Доҕоттору умнубакка,

Ыалларбытын тумнубакка

Соргу- дугуй дэһиэххэ,
Алгыс баһын сыалыахха!

Хомолтону, хоргутууну
Хомурахха хаалларан,
Саргылардаах санааны
Саҥа сылга соһуоҕуҥ!

Эргэ дьылга махтанан,
Эргиллэммит көрүөххэ,
Сорох курас түгэнин
Тургутууга холуохха.

Үлэ, үөрэх табыллан,
Ситиһиигит сиэттистин,
Ыарыы,тумуу умнуллан,
Ырааҕынан сырыттын!

Саҥа дьылга бигэтик
Үктэниэҕиҥ эрэллээх,
Иллээх олох, эйэ, дьол
Арылыннын аартыга!

                        ***

                                  Ольга Неустроева-Олюс

Ахсынньы ый аам даам тымныытын
Ахсарбакка,алыптаах аптаах күннэр
Алыһын кууһаллар мин санаабын сүрэхпин.
Аалсыһан ааһар күннэргэ ыраас
Атын оҕолуу санаан уһуктан,
Алыптаах түгэни күүтэр
Адьаһын бу тиийэн кэлиэхтии.
Аар айылҕам бүрүммүт кырыа хаара
Алтан дуйун кыырпах маҥан мөһүүрэнэн
Араастаан бүрүйбүтэ санааны көтөҕөр
Алгыстаах Саҥа дьылы кэтэһэн.
Араас уотунан оонньоон түннүктэр угуйаллар
Алыс диэн долгуйан,ситтэрбэт
Араас ыра санааҕын этэҕин.
Ахсынньы ый аам даам тымныыта
Аҕалар биһиэхэ саҥаны кэрэни
Алыһын күүтэбит алыптаах түгэни
Аарыма кырдьаҕастан оҕолуун -уруулуун
Аҕалаар биһиэхэ Саҥа дьыл, Саҥа кэм
Аҕалаар кэрэни,сырдыгы үтүөнү
Алыһын долгуйа күүтэбит түннүккэ,
Араастаан дьиримниир уоттаргар,
Аҕалаар биһиэхэ Ийэ сиргэ баар бары үтүөнү.

                                      ***

                 Айаанньа Уус.
                    25.11.2019с.
                     Баайаҕа б.

Саҥа дьыл мөһүүрэ мичээрдээх,
Кырыанан сууламмыт кэрэ күн.
Сырдык күөх ыраас муус кэриэтэ,
Курдаттыы дьэҥкэрэр бэлиэ кэм.

Кистэммэт аһаҕас мичээрдээх,
Оҕолуу санаалаах истиҥ күн…
Киэргэллээх харыйа анныттан,
Оҕолуу күүтэбит дьиктини…

Саҥа дьыл күлүмнүүр таҥастаах,
Тымныынан аргыйар оҕонньор…
Сиэн кыыһа Хаарчаана барахсан,
Тымныыбыт тырымнас мичээрэ.

Түүн үөһүн көрсөргө туһунан,
Алыптаах абылаҥ кууһуохтаах…
Тырымныыр мэник уот кэриэтэ,
Аптаах күүс санааны салайыа…

Саҥа дьыл тымныыны мөлтөтөр,
Истиҥ да иэйиилээх бэлиэ күн…
Сылытан барбатар даҕаны,
Илгийэр сып-сылаас тыыннаах күн.

                            ***

Саҥа дьыл »салгына» илгийэр,
Киһини »иһиттэн» сырдатар…
Саҥа дьыл »сытынан» туймаардан,
Көтүтэр »алыптаах» эйгэҕэ…

Ааһар сыл »салгына» сайҕанар,
Ол эрэн »кэрэтэ» син сөҥөр…
Алыптаах, алгыстаах түгэннэр,
Олохтоох сирдэрэ »Ахтылҕан»

Хаалаллар ол кэрэ »дойдуга»
Эргиллэр, элэҥниир эрэллээх…
Хаалаллар кэрэни баҕара,
Эн өйгөр-сүрэххэр ситимнээх…

Үүнэр сыл үгүһү ымсыырдар,
Саҕахха сандаарар сарыаллыы…
Үтүмэн үтүөнү кэрэни,
Саҥа дьыл бэлэхтиэ турдаҕа…

Саҥа дьыл арыллар түүнүгэр,
Күүтэбит Дьыл биэрэр »кэһиитин»…
Санаабыт түгэҕэр эрэллээх,
Кистэлэҥ »ырабыт» туолуо диэн…

                                       

                                     Татьяна Куличкина — Дедюкина
                                                                17_12 -2022 сыл

                               Күн дьолун күөрэтэ уунуохтун

Туох эрэ дьиктини ,кэрэни
Саҥа дьыл күнүгэр күүтэбит ,
Халлааҥҥа дьиримниир сулуспут ,
Ол дьолу сыдьаайа күөрэттин !

Бу бүгүн алыптаах киэһэҕэ ,
Тапталын сүтэрбит көрүстүн ,
Долгута дьиэрэйэр вальска,
Доҕоро ыҥыран соһуттун !

Соҕотох соҥуйбут дьүөгэҕэ ,
Доҕоттор истиҥник мичийэ ,
Кэһиилээх ,кэпсээннээх кэлэннэр ,
Үөрүүтэ кыымынан сыдьаайдын !

Бу күнтэн ыалдьыбыт үтүөрдүн ,
Кыыһырбыт көнньүөрэ мичээрдин ,
Үлэһит сырата табыллан ,
Дьол ,үөрүү аргыстаах дьулуйдун !

Саҥа дьыл алгыстаах түүнүттэн ,
Хас киһи баҕата туолуохтун !
Үөһэттэн угуйар сулуспут
Күн дьолун күөрэтэ уунуохтун !

 

            Кыһыммыт алыптаах кэрэтэ

Кыһыммыт алыптаах кэрэтэ
Омукпут күөн туттар кэпсээнэ,
Аргыардаах ,чысхааннаах тымныыта
Ыпсыыта көстүбэт сэһэнэ.

Сыа хаарбыт бастакы тунала
Күүтүүлээх айылҕа мааныта ,
Көтөргө ,сүүрэргэ түҥ тыаҕа
Тымныыга үллүктээх суорҕана ,

Дьүкээбил тырымныыр суһума
Айылҕа дьиктилээх көстүүтэ ,
Дьиэрэҥнии ,дьэргэҥнии устара
Тымныыбыт сэтэрбит бэлиэтэ .

Халлааҥҥа чаҕыллар сулустар
Кистэлэҥ киэлигэ угуйа ,
Чипчиҥнии — дьиримнии умайа
Хотугу айанньыт суолдьута.

Төгүрүк көмүс ый толбоно
Тулалыыр эйгэни сырдата ,
Ойуур тыа оһуорга суулана
Олоҥхо бу дьиҥнээх дойдута .

Эһээ дьыл Чысхааммыт чугаһыыр
Ыраахтан сыарҕата сырылыыр ,
Дьол — туску аргыстаах кэлэрин
Дьон — сэргэ үөрүүнэн көрсөбүт .

 

Үөрэ көр,сөҕө көр

Саҥа дьыл ,саргы дьыл
Сандаарыйан ,дьэ кэллэ,
Эргиччи күлүмнээн ,
Эчи бэрдин ,кэрэтин !

Эриэккэс харыйа
Эргичийэ дьиримнэс,
Эгэлгэ оонньуура
Эйэҥэлии чипчиҥнэс.

Үөрэ көр ,сөҕө көр
Остуоруйа дойдута ,
Эһэлиин ,куобахтыын
Үҥкүүлүүбүт ,ыллыыбыт.

Эйэҕэс Эһээ дьыл
Хаарчааналыын сэгэһэ,
Үөрүүнү бэлэхтээн
Хоробуоттаан эргийии.

Үөрэ көр ,сөҕө көр
Остуоруйа дойдута ,
Эһэлиин ,куобахтыын
Үҥкүүлүүбүт биир тэҥҥэ.

                                                     ( ОҔОЛОРГО)

Саҕаланна саҥа дьыл

Дьирибинэс уотунан
Дьиэбит тула сандааран ,
Оҕо — аймах көрүнэн
Саҕаланна саҥа дьыл.

Кэтэһиилээх бу дьылбыт
Саргы дьолун дайыттын,
Үүнэр сылбыт түөрэҕэ
Үөрүүбүтүн үрдэттин !

Эрэл санаа туолуута
Эрчим күүһү эбиэхтин !
Баҕа санаа бастыҥа
Байымынан диэлиттин !

Мааны астаах сандалы
Барҕа баайы түстээтин ,
Доҕоттордуун көрсүһүү
Дьол кустугун күөрэттин !

Таптал сылаас кутунан ,
Дьиэбит иһэ илгийдин !
Кэлэр сылбыт тускула
Дьолуотунан сыдьаайдын !