Загрузка...Ыам ыйын 27 күнэ — Библиотека күнэ
ССРС культуратын туйгуна Матрена Николаевна Хатылаева
“Идэбин таптыыр уонна олус наадалаах идэнэн ааҕар буоламмын, хара маҥнайгыттан дьулуурдаахтык үлэбин саҕалаабытым. Ордук, оҕолор кинигэни умсугуйан ааҕа үөрэнэллэригэр болҕомтобун уурбутум”,- диэн библиотекарь Матрена Николаевна Хатылаева тыллара кини олоҕун анаабыт үлэтин ис хоһоонун дьэҥкэтик көрдөрөллөр.
Матрена Николаевна эдэр специалист буолан сүрэхтэнэр кэмигэр, ааспыт үйэ 60-с сылларыгар, модун Сэбиэскэй Сойуус туругуран турар, дьон-сэргэ үлэни өрө тутан олох күөстүү оргуйар үтүө кэмин, оччотооҕу көлүөнэ үчүгэйдик өйдүүр. Дойдуга олох бары хайысхатыгар күүстээх кадрдар нэһилиэнньэ сайдыытын дьиҥ-чахчы быһаараллара. Маннык кэмҥэ Матрена Николаевна олоҕо биһиэхэ, Баайаҕаҕа, түстэммитэ билигин санаатахха олус улахан суолталаах эбит. Кини кэргэнэ, XX үйэ чулуу педагога Иннокентий Михайлович Хатылаевтыын, өйдөрүн-санааларын түмэн үөрэҕириигэ, культураҕа, нэһилиэк социальнай-экономическай сайдыытыгар киэҥ кэскиллээх үгүс үлэни үмүрүппүттэрэ, үйэлээҕи, сырдыгы айбыттара-туппуттара.
Нэһилиэкпит библиотеката Матрена Николаевна үлэлиир сылларыгар оройуоҥҥа эрэ буолбакка, республикаҕа бастыҥнар кэккэлэригэр киирбитэ. Айымньылаах үлэтинэн Социалистическай куоталаһыыга куруутун 1, 2, 3 миэстэлэри ылара. Оройуоҥҥа Баайаҕаҕа бастакынан уонна уһун сылларга соҕотох, кулууптан туспа библиотека дьиэтэ баар буолбута, 1971 с. “Туйгун үлэлээх библиотека” аата иҥэриллибитэ. Күн бүгүн Баайаҕа модельнай библиотеката М.Н.Хатылаева аатын сүгэр, кини үлэтин холобур туттан үлэлии-хамсыы олорор.
Загрузка...
Перезагрузить документ 
Открыть в новой вкладке