Сайар санаам саламата

Бэс ыйын 7 күнүгэр, уран тылы оһуордуу тиһэр  талааннаах  хоһоонньуппут  Татьяна Афанасьевна Куличкина- Дедюкина-Татыйаас, дойдутугар кэлэн “Сайар санаам саламата” диэн дьикти кэрэ ааттаах хоһооннорун хомуурунньугун дьонун-сэргэтин ортотугар биһирэмнээтэ.  11 түһүмэхтэн турар кинигэни  — ырытыыга холонор эдэр дьоммут, түмсүүбүт тутаах ырытааччылара сиһилии саас-сааһынан сырдаттылар, тыл баайдаах аҕам дьүөгэбит олоҕу анааран, кэрэни кэрэхсээн, саха төрүт дьарыгын, сиэрин-майгытын, уратытын туойар айар үлэтин үрдүктүк сыаналаатылар.  Ааҕыы лааҕырын оҕолоро автор кырачааннарга аналлаах хоһооннорунан “Сайыҥҥыга, сайылыкка” диэн  дьүһүйүүнү толордулар, тэрээһини оҕо саас чаҕаан тойугунан киэргэттилэр. Кинигэ биһирэмин  түмсүүбүт уус-уран салайааччыта Маргарита Романовна  Егорова истиҥ эйгэни олохтоон  үрдүк таһымҥа ыытта.

Татьяна Афанасьевна тулаайах оҕо саас кыһалҕатын билбитэ, үөрэххэ, сайдыыга, олоххо дьулуурунан дьоһун бүгүҥҥүтүн түстэммитэ. Сэрии сылын оҕотун, педагогическай үлэ бэтэрээнин, Россия суруналыыстарын сойууһун чилиэнин, хомоҕой тыллаах хоһоонньуту; нэһилиэк Сэбиэтин депутатынан,  түөлбэ, төрөппүт кэмитиэтин, дьахталлар түмсүүлэрин салайааччыларынан нэһилиэккэ общественнай үлэ үөһүгэр сылдьыбыт ытык киһибитин дьоро түгэнинэн нэһилиэк дьаһалтата, үлэлээбит оскуолата, бэтэрээн учуутал түмсүүтэ, түөлбэтин олохтоохторо, аймахтара, “Көмүлүөк күлүмэ” литературнай түмсүү истиҥник махтана эҕэрдэлээтилэр, баҕа санаа бастыҥын анаатылар. Татьяна Афанасьевна  саха уус уран тылын, дэгэтин толору  баһылаабыт,  республика күрэстэригэр ситиһиилээхтик кыттар киэн туттар биир бэлиэ ааптарбыт буолар. Кини, Дьокуускайга да олордор, дойдутун олоҕун, үлэтин  кэрэхсиир, иэйиитигэр иитэн хоһоонноругар холбуур.  Татьяна Дедюкина-Татыйаас   айар үлэтэ биһиги күннээҕи олохпутугар күүс-көмө буолар, кини айымньыларын  ыытар тэрээһиннэрбитигэр доргуччу ааҕабыт, кырачааннарбытыгар үөрэтэбит. Биһирэм дьоро күнүн көрсө биир дойдулаахпыт, мелодист Станислав Луковцев ыраах Бороҕонтон Татыйаас икки хоһоонугар ырыа айан бэлэх ыыппыта үөрүүбүтүн өссө үрдэттэ. Онтон бу дьоһун кинигэни Надежда Андросова-Айтылы бэлэмнээн,  эрэдээктэрдээн таһаарбытын санаттахха, Баайаҕа айар куттаахтарын айымньыта буолан тахсар.  Татьяна  Афанасьевна саҥа кинигэтин түмсүү кыттыылаахтарыгар бэлэхтээтэ, оҕолоро бэлэмнээбит баай астаах мааны сандалытыгар мустубут дьону күндүлээтэ.  Бэтэрээн учуутал үөлээннээхтэрэ, аймах-билэ дьоно, биир идэлээхтэрэ, суруйар-бичийэр эйгэҕэ алтыһар чугас дьоно  сүрэхтэн тахсар махтал тыллары куппутугар иҥэринэн, иһирэх тэрээһинтэн, истиҥ кэрэ көрсүһүүттэн астынан, дуоһуйан  тарҕастыбыт.

Тэрээьин хаартыскаларын, видеолары библиотека телеграм ханаалыгар билсин.