Барыбыт үөрүүтэ

М.Н.Хатылаева аатынан Баайаҕа модельнай библиотекатын «Көмүлүөк күлүмэ» литературнай түмсүүтүгэр ааһан эрэр 2024 сыл улахан үөрүүнү уонна ситиһиини тосхойдо. Ол курдук биһиги литературнай критикпит  Ольга Николаевна  Макарова Саха сирин Суруйааччыларын сойууһун куоластааһынын  ааһан Россия Суруйааччыларын сойууһугар мэктиэлэннэ,  Суруйааччылар сойуустарын 90 үбүлүөйдээх сылын бэлиэтиир тэрээһиннэргэ кыттыыны ылан кэллэ, биир дойдулаахпыт Гаврил Андросов салайааччылаах Суруйааччылар сойуустарыгар нэһилиэк дьонун-сэргэтин аатыттан Эҕэрдэ Сурук туттарда.

Бу ый 26-27 күннэригэр Саха сирин Суруйааччыларын сойууһа 90 сылыгар аналлаах тэрээһиҥҥэ кыттар чиэскэ тиксэн көрөн-истэн кэллим. Биһиги төрөөбүт литературабыт үөскээн, сайдан кэлбит кэмэ история уораҕайыгар бэрт кыракый, кылгас кэм буоллаҕа. 2025 сылга 105 сылын бэлиэтиэхпит. Олоҥхо олбоҕун сылааһыгар бигэнэн хара үөскүөҕүттэн аан дойду ааттаахтарын айымньыларыныын литература эйгэтигэр эрдээхтик эргийсибитинэн барбыта.  1934 с. П.А.Ойуунускай председателлээх Саха сирин суруйааччыларын сойууһа тэриллибитэ. Суруйааччылар сойуустарын 90 сылынан эҕэрдэлии Москваттан, Карелияттан уонна Татарстантан суруйааччылар кэлбиттэрэ тэрээһин болҕомто киинигэр буоларын туоһулуур.

Татарстан Суруйааччыларын сойууһун председателэ Ркаил  Зайдуллин икки республика сойуустарын доҕордоһуута С.П.Данилов саҕаттан дириҥ силистээҕин-мутуктааҕын, салгыы сайдарга, бииргэ үлэлииргэ дьоһун тулааһын буоларын тоһоҕолоон этэн туран элбэх өрүттээх киэҥ үлэлэрин, айар таһымнарын бэлиэтээн туран Татарстан Суруйааччыларын сойууһун үрдүк наҕараадатын, түөскэ анньыллар бэлиэтин Саха сирин Суруйааччыларын сойууһун председателигэр Г.Г.Андросовка, председатели солбуйааччы Н.И.Харлампьеваҕа, норуодунай суруйааччы Н.А.Лугиновка туттартаата. Ыраахтан кэлбит ыалдьыттар дьоһун  кэһиилээх кэлбиттэр: норуодунай суруйааччылар Н.И.Харлапьева, Н.А.Лугинов уонна Г.Г.Андросов кинигэлэрин, саха поэзиятын антологиятын татаар тылынан таһаарбыттарын кэпсээтилэр, П.А.Ойуунускай кинигэтин (татаардыы тылынан) таһаарбыттарын аҕалбыттар. Бу долгутуулаах, үөрүүлээх сонуну Правительство иккис дьиэтигэр мустубут дьон дохсун ытыс тыаһынан көрүстүлэр. Манна даҕатан эттэххэ Республикатааҕы медиа кииҥҥэ “Татар оҕоҕо аналлаах литературатын антологиятын” биһирэмэ улахан болҕомтону тарта.

Үөрүүлээх мунньахха Ойуунускай өлбөт-сүппэт улуу үлэтин, билигин үлэлии-хамсыы, айа-тута сылдьар суруйааччылар үлэлэрин уонна инникигэ туһуламмыт үлэ торумнарын иһиттибит.

Сахам сирин албан ааттаах суруйааччыларын, поэттарын, орто саастаах уонна эдэр айар куттаах дьонун литература түмэлигэр, правительство иккис дьиэтигэр бииргэ мунньан көрбүппүттэн, саҥаларын-иҥэлэрин истибиппиттэн, Н.И.Харлампьеваттан, С.А.Попов-Сэмэн Туматтан, Е.В.Слепцова- Куорсуннаахтан, О.Н.Корякина-Умсуураттан, Д.Н.Макеевтан кинигэ бэлэхтэппиппиттэн үөрэбин, долгуйабын. Дьоһун тэрээһиҥҥэ сылдьыбытым — олоҕум биир далбар түгэнэ.

Ольга Макарова

Баайаҕа Томторо, 2024 с.