Суруйааччыны үүннэрэр кириитик

Бу дьыл кулун тутар 6 күнүгэр А.Е.Мординов аатынан Таатта лицейигэр Россия суруйааччыларын Сойууһугар киирбит биир дойдулаахтарбытын төрөөбүт улуустарыгар чиэстээһин, көрсүһүү буолан ааста.  Алампалыы эттэххэ “хайа да идэттэн үрдүк бисээтэл идэтин” литературнай критик Ольга Макарова, драматург Утум Захаров, прозаик Валерий Андросов сүктүлэр.

Үөрүүлээх тэрээһиҥҥэ Саха Сирин Суруйааччыларын Сойууһун  бэрэссэдээтэлэ Гаврил Андросов, народнай суруйааччылар Сэмэн Тумат, Куорсуннаах, ону тэҥэ Анатолий Слепцов,  Бүөтүр Хара, Намтан Николай Васильев — Харыйалаах Уола ыалдьыттаатылар, тылларын-өстөрүн тиэртилэр.

Гаврил Андросов саҥа киирбит суруйааччылар уратыларын, үлэлэрин-хамнастарын билиһиннэрэригэр литературнай кириитикэнэн наукаҕа сыстыбакка эрэ дьарыгырар дьон тарбахха баттаналларын уонна суруйааччы Сойууһугар ылыллаллара сэдэҕин бэлиэтээтэ. Кини  урукку дьылларга үлэлээбит биллиилээх критик Е.П.Шестаков – Эрчимэн кэннэ  2015 сыллаахха Николай Рыкунов киирбитин  эттэ. Онон Ольга Николаевна  чахчы да тарбахха баттанар дьоннортон биистэрэ буолан, бу   уустук эйгэҕэ  уһун сыллар устата илиитин араарбакка үлэлээтэ. 

Народнай суруйааччы Елена Слепцова-Куорсуннаах  санаатын маннык үллэһиннэ: «Литературнай критика туруга билигин наһаа мөлтөх. Манна күүстээх интеллектуальнай үлэ ирдэнэр, литературнай критик наһаа элбэх билиилээх, классическай литератураны барытын аахпыт, билэр буолуохтаах. Билиҥҥи критикаҕа ол олох тиийбэт, улахан историческай романы, смысловой нагрузкалаах айымньылары ырытыы кыаллыбат, тоҕо диэтэххэ билигин билии-көрүү таһыма намтаабыт кэмэ. Ол иһин биһиэхэ Ольга Николаевна курдук талааннаах, билиилээх, күүскэ үлэлии олорор киһи Суруйааччы Сойууһугар киирбитэ улахан үөрүү буолар.» 

Суруйааччыга литературнай критика суолтатын Бүөтүр Хара тылларыттан иһиттибит:  “Ольга Николаевна мин “Хара Дьэллик” сэһэммин ырытыаҕыттан, мин онтон эрдийэн, бэйэбэр эрэнэр, суруйар буолбутум, кини суруйааччыны үүннэрэр кириитик” диэн махталлаах тыл эттэ.

Баайаҕаттан делегация киирэн “Көмүлүөк күлүмүттэн” Россия суруйааччыларын Сойууһугар киирбит айар үлэһиппитин суруйааччылар, улуус общественноһын уонна ааҕааччыларын иннигэр сырдаттыбыт. Нэһилиэк баһылыгын солбуйааччы А.А.Николаева, литературнай түмсүүттэн М.Р.Егорова, П.Н.Кустурова, Г.И.Неустроева, А.Н.Кустурова, үөрэппит оҕото, улуус Мунньаҕын депутата Н.С.Андросов дьиҥ сахалыы куттаах, Ийэ өйдөөх Тыл ууһа, киэн туттар биир дойдулаахпыт, учуутал Ольга Николаевна Макароваҕа эҕэрдэ истиҥин, баҕа санаа бастыҥын анаатыбыт.